15.12.2025 | 15:31
Արարատի մարզի որոշ շրջաններում 24 ժամ ջուր չի լինի
ԵՄ-ն և ԱՀԿ-ն միավորում են ջանքերը՝ հաջակցություն Հայաստանում COVID-19-ի դեմ պատվաստանյութերի բաշխման և պատվաստման
12.02.2021 | 17:25
Եվրոպական միությունը և Առողջապահության համաշխարհային կազմակերպության (ԱՀԿ) եվրոպական տարածաշրջանային գրասենյակը միավորում են ջանքերը՝ աջակցելու Հայաստանում COVID-19-ի դեմ պատվաստանյութերի բաշխմանը և պատվաստումների իրականացմանը:
Եվրամիության կողմից ֆինանսավորվող և ԱՀԿ-ի կողմից իրականացվող ծրագիրը կներառի COVID-19-ի դեմ պատվաստանյութերի բաշխման և պատվաստումների իրականացման բոլոր փուլերը և կծառայի որպես խոշոր ներդրում` պատվաստումների համակարգը հզորացնելու համար:
Ծրագիրն իրականացվելու է ԱՀԿ-ի կողմից երեք տարիների ընթացքում` որպես Եվրոպական միության կողմից ֆինասնավորվող 40 միլիոն եվրո արժողությամբ նախաձեռնության մի մաս, որի նպատակն է աջակցել ԱՀԿ-ի՝ եվրոպական տարածաշրջանի վեց երկրներին COVID-19-ի դեմ պատվաստումների նախապատրաստման, իրականացման և մոնիտորինգի անցկացման գործում:
«Պատվաստանյութերը մեզ մոտեցնում են համավարակի ավարտին: Այնուամենայնիվ, մենք երբեք չենք հաղթի համավարակը, եթե պատվաստումների ծածկույթը կենտրոնացված լինի աշխարհի միայն որոշակի հատվածներում: Եվրոպական միությունն աջակցում է Հայաստանին նաև պատվաստումների իրականացման գործընթացում, որպեսզի շուտով կարողանանք հանդիպել միմյանց` առանց վախենալու մեր և մեր մտերիմների կյանքի համար: Միասին մենք ավելի արագ կհաղթահարենք այս համավարակը», – ասաց Հայաստանում Եվրոպական միության դեսպան Անդրեա Վիկտորինը:
«COVID-19-ը սահման չի ճանաչում, այն համախմբում և միասնական լուծումներ է պահանջում: Հատկանշական է, որ համերաշխության սկզբունքից ելնելով` համախմբվեցինք ու այսօր էլ փորձում ենք միասնական ուժերով պայքարել այս արհավիրքի դեմ: Եվրոպական Միության, Առողջապահության համաշխարհային կազմակերպության հետ Հայաստանի առողջապահության նախարարության միասնական ծրագրերի շարունակականությունն այս ամենի ապացույցն է: Համավարակի օրերին մեր երկիրը ևս մեկ մարտահրավերի առաջ կանգնեց: Պատուհասած պատերազմը ոչ միայն պետության, այլև առողջապահական համակարգի համար էր լուրջ փորձություն: Չնայած ԱՀԿ-ի` պատերազմի դադարեցման կոչերին, Հայաստանը ստիպված եղավ անցնել 44-օրյա դժոխքի միջով: Այդուհանդերձ, համավարակի ուժգնացման և պատերազմի ընթացքում Հայաստանը զգաց առկա ամուր գործակցության արդյունքը: Մեր գործընկերներն այսօր էլ պատրաստակամ են ու մեր կողքին են պատվաստանյութի ձեռքբերման գործընթացում: Հույս ունենք, որ «Համերաշխություն հանուն առողջության» համատեղ նախաձեռնությունը կօգնի գործընկեր երկրներին դյուրացնելու համավարակի առաջացրած բոլոր խոչընդոտները», ասաց ՀՀ Առողջապահության նախարար Անահիտ Ավանեսյանը:
ԱՀԿ ներկայացուցիչ, ԱՀԿ հայաստանյան գրասենյակի ղեկավար Եգոր Զայցևն նշում է. «Պատվաստանյութերը հույս և պաշտպանություն են տալիս նրանց, ովքեր պայքարում են այս համավարակի առաջնագծում, և նրանց, ովքեր գտնվում են առավելագույն ռիսկային խմբում և ապրում են՝ վախենալով վարակի կործանարար ազդեցությունից: Այս առատաձեռն աջակցության շնորհիվ ԱՀԿ-ն կարող է ամրապնդել իր համագործակցությունը Հայաստանի կառավարության հետ` ապահովելու, որ պատվաստանյութերը հնարավորինս արագ և արդյունավետորեն հասնեն նրանց, ովքեր ամենաշատը դրանց կարիքն ունեն»:
Ծրագրի ֆինանսական միջոցները կուղղվեն առաջին փուլի նախապատրաստական և պատվաստանյութերի բաշխման աշխատանքների կատարմանը` շեշտը դնելով ռազմավարական ծրագրային ոլորտներում առկա հրատապ կարիքների վրա, ինչպիսիք են՝ պլանավորումը, անհրաժեշտ սարքավորումները/պարագաները, բուժաշխատողների վերապատրաստումը և տեղեկատվական արշավները:
Ծրագիրը շարունակում է ԵՄ-ի և ԱՀԿ-ի կողմից տրամադրվող ընթացիկ աջակցությունը՝ ուղղված COVID-19-ի համավարակին, ներառյալ ԵՄ-ի կողմից ֆինանսավորվող, 35 միլիոն եվրո արժողությամբ «Համերաշխություն հանուն առողջության» համատեղ նախաձեռնությունը, որի նպատակն է աջակցել գործընկեր երկրներին վիրուսի դեմ պայքարում և ավելի արդյունավետորեն լուծել առավել խոցելի մարդկանց կարիքները:
