Ապստամբությունն ավելի մեղմ տարբերակ է, քան Փաշինյանի՝ իշխանության ղեկին մնալը. Վազգեն Մանուկյան. ՏԵՍԱՆՅՈՒԹ

Պետք է ամեն ինչ անել, որ համաժողովրդական շարժում լինի: Այս մասին այսօր Ազատության հրապարակում ընդդիմության հրավիրած հանրահավաքի ժամանակ լրագրողների հետ զրույցում ասաց «Հայրենիքի փրկության շարժման» վարչապետի թեկնածու Վազգեն Մանուկյանը՝ անդրադառնալով հարցին, թե ինչ ելքեր է քննարկում ընդդիմությունը, այն դեպքում, երբ Նիկոլ Փաշինյանը չի պատրաստվում հեռանալ, և արտահերթ ընտրությունների հեռանկար դեռևս չկա:

«Մի քանի հարյուր հազար մարդ կա, որ սարսափելի էմոցիոնալ դժգոհության մեջ են, բայց մի միլիոն մարդ էլ կա, որ դժգոհ է Նիկոլ Փաշինյանից, բայց հավես չունի մասնակցել այս ամեն ինչին, որովհետև կոտրված է: Պետք է կարողանալ այդ մարդկանց փողոց հանել, որ այս շարժումը լինի տպավորիչ ծավալով: Նիկոլ Փաշինյանն ինքը չի հրաժարվի՝ մի քանի պատճառով։ Նախ՝ ինքը շատ վախենում է, թե ինչ պատասխան է տալու իշխանությունը կորցնելուց հետո: Երկրորդ՝ չտես մարդիկ մտել են իշխանություն, վայելում են, իրենք հեշտ իշխանությունը չեն տա: Բայց այդ դեպքում պետք է կոտրել, փչացնել իր հենարանները: Իսկ ովքե՞ր են իր հենարանները. «Իմ քայլը» խմբակցությունն է, պետք է աշխատել «Իմ քայլի» հետ, և մի մասն էլ Ոստիկանության բարձրաստիճան սպաներն են, որոնք դաժան ձևով էին վարվում ժողովրդի հետ: 2-3 հենարան է, որոնք եթե փլվեն, ինքն էլ կփլվի»,- նշեց Մանուկյանը:

Անդրադառնալով դիտարկմանը, որ ընդդիմությունը դադար է վերցրել, Վազգեն Մանուկյանը նշեց. «Դադարի օգուտն այն էր, որ տեսա՝ շատացան այն մարդիկ, որոնք առաջ չէին պատկերացնում երկրի վիճակը, հիմա պատկերացնում են: Հարցումներն էլ են ցույց տալիս, որ գիտակցող մարդկանց թիվը ավելանում է, մարդիկ շոկից դուրս են գալիս: Շարժումն էլ իր ներսում քննարկեց իր բոլոր արածները, դասեր քաղեց և ամսի 20-ի հանրահավաքով շատ ավելի մեծ թափով կշարունակի հանրահավաքները»:

«Ժողովուրդն իրավունք ունի ապստամբության: Հեղափոխությունները նախապատրաստվում են, իսկ ապստամբությունները չեն նախապատրաստվում, դժգոհ ժողովուրդն է ապստամբում: Ես միշտ էլ կխրախուսեմ ապստամբությունը: Ցանկակած տարբերակ, որը մարդկանց նկատմամբ ֆիզիկական միջոցների չի դիմում, բայց նպաստում է իշխանությունից ազատվելուն, ես կխրախուսեմ: Այն վիճակը, որի մեջ հայտնվել ենք, լավ չեք պատկերացնում: Հազարավոր տարիների ընթացքում այսպիսի իրավիճակում չենք եղել, երբ որ երկրի ղեկավարը այսպիսի ցինիկ ձևով երկիրը ոչնչացնում է և ծախում է»,- ընդգծեց Մանուկյանը:

Անդրադառնալով հարցին՝ արդյո՞ք ապստամբության տարբերակն ավելի վտանգավոր չէ, քան ընտրությունները, Մանուկյանը նշեց. «Պետության համար չկա ավելի վտանգավոր տարբերակ, քան Նիկոլ Փաշինյանի վարչապետ լինելը: Մնացած բոլոր տարբերակները շատ ավելի մեղմ են, քան Փաշինյանի՝ իշխանության ղեկին մնալը»:

Մանրամասները՝ տեսանյութում։