Վլադիվոստոկում ԱՄՆ գլխավոր հյուպատոսությունը կարող է փակվել

Վլադիվոստոկում ԱՄՆ գլխավոր հյուպատոսությունը հնարավոր է փակեն գարնան կեսերին։ Այս մասին հայտնել է Վլադիվոստոկում ՌԴ ԱԳՆ ներկայացուցչության ղեկավար Անդրեյ Բրովարեցը, գրում է Կոմերսանտը։

«Սա Ամերիկայի Միացյալ Նահանգների պետական դեպարտամենտի միակողմանի որոշումն է, որը բոլոր ընթացակարգերից հետո իր վերջնական տեսքով կարող է իրականացվել մինչև 2021-ի գարնան կեսերը », – ասել  է Անդրեյ Բրովարեցը Պրիմորսկի երկրամասի կառավարության կայքում հրապարակված հարցազրույցում:

Դիվանագետը հույս  է հայտնել, որ ԱՄՆ նախագահի նոր վարչակազմը  Վլադիվոստոկում ԱՄՆ գլխավոր հյուպատոսության փակման մասին որոշումը կվերանայի։

«Այս առումով ես իմ կողմից կարող եմ հույս հայտնել, որ ԱՄՆ նոր նախագահի վարչակազմը կվերանայի այն, հատկապես, որ այս որոշումը հակասում է օտարերկրյա գործընկերների հետ Պրիմորիեի երկրամասի միջազգային համագործակցության զարգացման ընդհանուր օբյեկտիվ միտումներին»,- ասել է Բրովարեցը:

2020 թվականի դեկտեմբերին ԱՄՆ պետքարտուղար Մայք Պոմպեոն որոշում էր կայացրել փակել Վլադիվոստոկում ԱՄՆ գլխավոր հյուպատոսությունը և դադարեցնել Եկատերինբուրգում գլխավոր հյուպատոսության աշխատանքը:

Հունվարին ԱՄՆ գլխավոր հյուպատոս Էմի Սթորյուն հայտարարել էր Եկատերինբուրգում գլխավոր հյուպատոսության աշխատանքը շարունակելու մասին: Համաձայն որոշ տեղեկությունների ՝ գլխավոր հյուպատոսությունների փակումը պայմանավորված է Ռուսաստանի՝ 2017 թվականին ամերիկացի դիվանագետների թիվը կրճատելու որոշմամբ:

Տաթև Ֆռանգյան