Ռուսական ԿԳԲ-ի գործակալները լեգիտիմացված են ՀՀ-ում․ Արթուր Սաքունց. ՏԵՍԱՆՅՈՒԹ

Իրավապաշտպան Արթուր Սաքունցը Factor TV-ի հետ զրույցում անընդունելի համարեց այն, որ Հայաստանի իրավապահ մարմինները քննության առարկա չեն դարձրել «Դոսյե» կենտրոնի հրապարակումը, որտեղ նշվում է, թե Կրեմլը Հայաստանի գրեթե բոլոր պետական կառույցներում  գործակալներ ունի:

««Դոսյե» կենտրոնի կողմից հրապարակված նյութի արդիականությունը ԱԱԾ-ի մարտահրավիրների տեսակետներից հիմա առավել քան կարևոր է: Ինչո՞ւ, որովհետև ներկայացվում է մի ամբողջ ցանկ՝ թե՛ պաշտոնատար անձանց, թե՛ քաղաքական, թե՛ հանրային գործիչների, որոնք ուղղակի աշխատում են օտար երկրների շահերի օգտին: Եթե որևէ այլ երկրում՝ Լեհաստանում, Չեխիայում, նման տեղեկատվություն տարածվեր, ապա այդ մարդիկ ոչ միայն կդառնային կենդանի դիակներ, այլ նաև Գլխավոր դատախազությունը կհարուցեր քրեական գործ՝ պարզելու համար, թե ինչքանով են այդ մարդիկ վնասել ազգային անվտանգությանը»,- ասաց իրավապաշտպանը:

Նա նաև նշեց, որ Գլխավոր դատախազությունը պետք է պարզաբանում ներկայացնի, թե ինչո՞ւ ԱԱԾ-ն քրեական գործ չի հարուցել և պատասխանի մի շարք այլ հարցերի:

«Արդյո՞ք նյութեր նախապատրաստվել են, թե՝ ոչ։ Եթե նախապատրաստվել են, որտեղ են արդյունքերը, եթե չեն նախապատրաստվել, ապա ինչո՞ւ: Գործ ունենք ազգային անվտանգության սպառնալիքների, մարտահրավերների հետ, պետական մարմինները ցուցաբերել են անգործություն: Իշխանության տարբեր մարմիններ իրենց անգործությամբ արդյո՞ք չեն հիմնավորում այն կասկածը, որ հետամուտ չեն ՀՀ ազգային անվտանգության սպառնալիքների վերաբերյալ; հրապարակված տեղեկություններով քննություն չանելով և անպատիժ թողնելով մեղավորներին»,- ասաց նա:

Ըստ իրավապաշտպանի՝ «Դոսյե»-ի հրապարակումը պատշաճ քննության նյութ չդառնալու հարցում իր մեղավորությունն ունի նաև խորհրդարանը․ «Ազգային ժողովի որևէ խմբակցություն չնախաձեռնեց այս հարցերով քննիչ հանձնաժողով ստեղծել և քննության առնել հրապարակումը: Մարդկանց պետք էր կանչել հանձնաժողով և ստանալ հարցերի պատասխաններ»:

Արթուր Սաքունցը, միաժամանակ, նշեց. «Ռուսական ԿԳԲ-ի գործակալները լեգիտիմացված են ՀՀ-ում և ՀՀ-ն որևէ իմունիտետ չունի սա կանխելու համար»:

Հարցազրույցն ամբողջությամբ՝ տեսանյութում:

Նարեկ Կիրակոսյան