16.09.2026 | 23:17
Գեղարքունիքի մարզի մի շարք հասցեներում 24 ժամ ջուր չի լինի
Ղրղզստանում մեկ շաբաթվա ընթացքում ձերբակալվել է երկրորդ նախկին վարչապետը
Քաղաքականություն
04.02.2021 | 22:46
Ղրղզստանի նախկին վարչապետ, խորհրդարանի պատգամավոր Կուբանիչբեկ Ժումալիևը ձերբակալվել է կոռուպցիայի կասկածանքով. հաղորդում է Interfax-ը՝ հղում կատարելով Ղրղզստանի ազգային անվտանգության պետական կոմիտեին:
Քննության տվյալներով ՝ Ժումալիևը, լինելով պատգամավոր և միաժամանակ Ղրղզստանում միջազգային բժշկական համալսարանի փաստացի սեփականատեր, իր քաղաքական ազդեցությունն օգտագործելով ճնշում է գործադրել կրթական ոլորտի օրենսդիրների վրա ու ապօրինաբար ստացել է կրթական գործունեություն վարելու իրավունքի արտոնագիր:
Միևնույն ժամանակ, լիցենզավորող հանձնաժողովն ի սկզբանե հրաժարվել էր բժշկական ինստիտուտին լիցենզիա տրամադրել՝ օրենսդրական պահանջներին անհամապատասխանության պատճառով: Սակայն ԿԳՆ ղեկավարության վրա Ժումալիևի ճնշման պատճառով հանձնաժողովի եզրակացությունը փոխվել է դրական ուղղությամբ:
Բացի այդ, հաստատվել են Ժումալիևի, ինչպես նաև նրա հետ փոխկապակցված անձանց ու տնտեսվարող սուբյեկտների կողմից ապօրինի հարստացման, հանցավոր եկամուտների օրինականացման ու առանձնապես խոշոր չափերով հարկերի վճարումից խուսափելու փաստերը:
Նշվում է, որ շուրջ 78 անշարժ գույքի սեփականություն է վերագրվում Ժումալիևին այդ թվում` առևտրի կենտրոններ, կրթական և բժշկական հաստատություններ, հյուրանոցներ, օգտակար հանածոների հանքավայրեր, հեռուստառադիոընկերություն և այլն:
Ժումալիևը 1996-1998 թվականներին զբաղեցրել է Ղրղզստանի վարչապետի պաշտոնը: 2015 թվականից նա հանդիսանում է Ղրղզստանի խորհրդարանի պատգամավոր:
Մինչ այդ, հունվարի 28-ին ձերբակալվել էր Ղրղզստանի մեկ այլ նախկին վարչապետ Մուհամեդկալի Աբիլգազիևը, նրան կասկածում են կոռուպցիայի ու ապօրինի հարստացման մեջ:
