ՌԴ սահմանը բացվել է․ մեծ թվով շիրակցիներ շտապում են մեկնել արտագնա աշխատանքի

Փետրվարի 1-ից մինչև մարտի 1-ը գործելու է «Ճամփորդի՛ր առանց COVID-19» պիլոտային ծրագիր, որով Հայաստանից Ռուսաստան և հակառակ ուղղությամբ ճամփորդելու համար ուղևորին, կորոնավիրուսի թեստի բացասական արդյունքի առկայության դեպքում, թույլատրվում է ՌԴ մեկնել։

Ռուսաստան մուտքի արգելքի վերացմանը սպասում էին հատկապես Շիրակի մարզի համայնքների բնակիչները։ Հայաստանի ամենաաղքատ մարզի ընտանիքները հիմնականում ապրում են արտագնա աշխատանքի հաշվին։ Նախորդ տարի, համավարակի սահմանափակումներով պայմանավորված, արտագնա աշխատանքի մեկնողների հիմնական մասը մնաց Հայաստանում։

Մարմաշեն համայնքի ղեկավար Կարեն Արշակյանը Factor.am-ի հետ զրույցում պատմեց, որ արտագնա աշխատանքի մեկնել ցանկացողների թիվը շատ մեծ է՝ մարդիկ մեկ տարուց ավելի նորմալ աշխատանք չեն ունեցել։ Նա նշեց նաև, որ ծատերը մեկնում են ընտանիքի անդամների հետ միասին։

«Գիտեմ, որ մեկ ամսով բացել են, ես եղել եմ Ախուրյանի անձնագրային բաժնում՝ երևի մոտ 100 մետր հերթ էր տղամարդկանց։ Հետաքրքրվողների թիվն ահավոր մեծ է՝ ոչ միայն արտագնա աշխատանքի մեկնելու, ընտանիքի անդամներին էլ իրենց հետ են ուզում տանել։ Ովքեր երեխաներ ունեն՝ 16-17 տարեկան, գնում են իրենց ընտանիքներով»,- ասաց Կարեն Արշակյանը։

Ըստ նրա՝ Հայաստանից հեռանալու միտում կա ոչ միայն Մարմաշեն, այլև բոլոր համայնքներում։
«Ու շատ հուզող թեմա է՝ դաշտերը կմնան անմշակ, գումարները չեն վճարվի ժամանակին, մարդիկ դուրսը։ Չգիտեմ՝ ինչ պիտի լինի, ահավոր վիճակ է արդեն»,- ասաց մեր զրուցակիցը՝ հավելելով, որ անցյալ տարի արտագնա աշխատանքի չմեկնելու պատճառով մարդիկ հայտնվել են ծանր սոցիալական վիճակում։

«Ահավոր վիճակ է մեզ մոտ։ Եթե մյուս մարզերում կա ինչ-որ աշխատանք՝ արդյունաբերություն, արտադրություն, Շիրակի մարզում շատ քիչ կա։ Հիմնականում արտագնա աշխատանքի գումարների հույսին են։ Գիտեք՝ մեր մարզի մասին ընդհանրապես մտածող չկա»,- ասաց Կարեն Արշակյանը։

Նրա խոսքով՝ մարդիկ օգտագործել են կուտակած գումարները, բանկերից վարկեր վերցրել ու հայտնվել ծանր վիճակում։

«Վստահ եմ՝ ժողովրդի 90 տոկոսը բանկերի տակից դուրս չի գա, ստիպված պիտի թողնեն, Հայաստանից դուրս գան։ Գնում են գումար աշխատեն, բանկերի վարկերը վճարեն»,- ասաց Մարմաշեն համայնքի ղեկավարը։

Նրա համոզմամբ՝ հետպատերազմյան այս իրավիճակում արտագաղթի մեծ ալիք կլինի Շիրակի մարզից։

«Ով դրսում հարազատ ունի, բարեկամ ունի, լրիվ դուրս կգան, ով հնարավորություն ունի տուն-ընտանիքը տեղափոխելու, հաստատ դուրս կգան։ Հիմնական ուղղությունը Ռուսաստանն է։ Ունենք նաև Ամերիկայում ապրողներ մեր տարածաշրջանից, նաև այն կողմի վրա երևի ուղղություն կվերցնեն։ Ով ինչ հնարավորություն ունի»,- հավելեց նա։
Կարեն Արշակյանը նշեց նաև՝ բնակչության շրջանում նաև անհանգստություն կա այն առումով, որ Շիրակի մարզի Ամասիայի, Ախուրյանի ու այլ տարածաշրջանները բնակեցված են եղել թուրքերով, և մարդիկ մտահոգություն են հայտնում, որ, միգուցե, պահանջեն նաև այդ տարածքները՝ չնայած եռակողմ հայտարարության մեջ նման կետ չկա։
Այնուամենայնիվ, չնայած առկա դժվարություններին՝ համայնքում նաև 29 արցախցի ընտանիքի են ընդունել։ Նրանց մի մասը վերադարձել է Արցախ, մյուսները շարունակում են մնալ այնտեղ։ Համայնքի ղեկավարն ասաց՝ նրանց կարիքներն ապահովված են, խնդիրներ չունեն։

Էմմա Չոբանյան