Օգնենք հաշմանդամություն ունեցող անձանց վերագնահատել իրենց հնարավորությունները․ Փաշինյան. ՏԵՍԱՆՅՈՒԹ

Կառավարության նիստում քննարկվում է «Հաշմանդամություն ունեցող անձանց իրավունքների մասին» և «Անձի ֆունկցիոնալության գնահատման մասին» ՀՀ օրենքների նախագծերի փաթեթը,որով՝ հնարավորություն կտրվի իրականացնել անձի կարիքների բազմակողմանի գնահատում, հաշմանդամությունը կդիտարկվի ըստ անձի ֆունկցիոնալության սահմանափակման աստիճանի՝ հաշվի առնելով նաև միջավայրային գործոնների ազդեցությունը:Հաշմանդամության սահմանման բժշկական մոդելից անցում կկատարվի ֆունկցիոնալության գնահատման մոդելի:

Աշխատանքի և սոցիալական հարցերի նախարար Մեսրոպ Առաքելյանի խոսքով՝ ներկայումս հաշմանդամություն ունեցող անձանց սոցիալական պաշտպանության մոտեցումներն ու սկզբունքները սահմանված են «Հայաստանի Հանրապետությունում հաշմանդամների սոցիալական պաշտպանության մասին» 1993 թվականին ընդունված օրենքով, ինչը հնարավորություն չի տվել իրականացնել անձի կարողությունների բազմակողմանի գնահատում, հաշվի չեն առնվել շրջակա միջավայրի գործոնները, որոնք էական ազդեցություն ունեն հաշմանդամություն ունեցող անձանց հասարակական կյանքում լիարժեք գործունեությունն իրականացնելու վրա:

Օրենքի նախագծով սահմանվում է հաշմանդամություն ունեցող անձանց իրավունքների պաշտպանության հետ կապված հարաբերությունները, հաշմանդամություն ունեցող անձանց իրավունքների ապահովման, խթանման և պաշտպանության պետական քաղաքականության նպատակը, հիմնական սկզբունքները և ուղղությունները։

Հաշմանդամության խմբերի փոխարեն (1-ին, 2-րդ, 3-րդ խումբ և հաշմանդամ երեխա) այսուհետ կսահմանվեն անձի ֆունկցիոնալության սահմանափակման աստիճաններ՝ թեթև, միջին, ծանր, խորը:

«Այսպիսի ռեֆորմով պետք է երկու խնդիր լուծենք՝ առաջինը՝ օգնենք հաշմանդամություն ունեցող անձանց վերագնահատել իրենց հնարավորությունները, երկրորդ՝ հանրությունը վերագնահատի հաշմանդամություն ունեցող անձանց պոտենցիալը՝ նրանց ներգրավելու երկրի զարգացման գործում»,- ընդգծեց վարչապետ Նիկոլ Փաշինյանը:

Մանրամասները՝ տեսանյութում: