Ալեքսեյ Նավալնին ազատազրկման է դատապարտվել

Ռուսաստանցի ընդդիմադիր գործիչ Ալեքսեյ Նավալնին կարող է շուրջ 2.5 տարի բանտում անցկացնել։ Փետրվարի 2-ին նման որոշում է կայացրել Մոսկվայի Սիմոնովսկի դատարանը։ Պատիժը, որը սահմանվել է 2014 թվականի քրեական գործերից մեկով, փոխարինվել է 3.5 տարի ազատազրկմամբ՝ ընդհանուր ռեժիմի գաղութում, գրում է svoboda.org-ը։

Ընդդիմադիր գործիչը անազատության մեջ կանցկացնի շուրջ 2.5 տարի, քանի որ 2014 թվականին մի քանի տարի ամիս տնային կալանքի տակ է եղել։ Հաշվի կառնվի նաև 2021 թվականի հունվարի 17-ից մեկուսարանում նրա անցկացրած ժամանակը։

Դատարանը համարել է, որ Նավալնին չի կատարել պայմանական պատժի հետ կապված դատարանի սահմանած պարտավորությունները։ Դատարանի որոշումը կարող է բողոքարկվել։ Նշվում է, որ Նավալնին ներկայում քննչական մեկուսարանում է, ուր տեղափոխվել է Գերմանիայից ՌԴ վերադառնալուց հետո։ Հիշեցնենք՝ նա Բեռլինում բուժվում էր թունավորումից հետո։

Աղբյուրը հիշեցնում է, որ Ալեքսեյ Նավալնին 2014 թվականին խարդախության մեղադրանքով դատապարտվել է 3.5 տարվա ազատազրկման՝ 5 տարի փորձնական ժամկետով (որը հետագայում երկարաձգվել է ևս մեկ տարով)։

Ինքը՝ Նավալնին, գործն ու դատավճիռը քաղաքական է համարում։ 2017 թվականին Մարդու իրավունքների եվրոպական դատարանը որոշում կայացրեց, որ, այսպես կոչված, «Իվ Ռոշեի» գործը խախտել է Նավալնիի՝ արդար դատաքննության իրավունքը։ Նրան փոխհատուցում են վճարել։ Ռուսաստանի Գերագույն դատարանը, սակայն, դատավճիռը օրինական է ճանաչել և հրաժարվել է փոխել այն։