19.01.2026 | 12:00
Կիևյան կամրջի տակ տղամարդու դի է հայտնաբերվել // Լարսը փակ է․ ԼՈՒՐԵՐ
Էրդողանը ուզում է փոխել Թուրքիայի Սահմանադրությունը
Քաղաքականություն
02.02.2021 | 15:58
Թուրքիայի նախագահ Ռեջեփ Թայիփ Էրդողանը հայտարարել է, որ ժամանակն է քննարկումներ սկսել երկրի նոր Սահմանադրության հարցի շուրջ՝ խոստանալով, որ շուտով կներկայացվեն բարեփոխումների փաթեթները, գրում է Ahval գործակալությունը։
«Միգուցե ժամանակն է՝ մեկ անգամ ևս քննարկել Թուրքիայի Սահմանադրությունը։ Առաջիկայում քայլեր կձեռնարկենք նոր Սահմանադրության ուղղությամբ»,- ասել է Էրդողանը։
Ավելի վաղ նա խոստացել էր ներկայացնել դատաիրավական ու տնտեսական բարեփոխումների ծրագիր, որը երկիրն առաջ կտաներ 2023 թվականի 100-ամյակին ընթառաջ։ Բարեփոխումներն ընդգրկելու էին նոր տնտեսական քաղաքականությունը՝ հիմնված գների, ֆինանսների ու միկրոտնտեսական կայունություն, ինչպես նաև շեշտադրվում էր մարդու իրավունքների ոլորտում ծրագրերի վրա։
«Ակնհայտ է, որ Թուրքիայի խնդիրների արմատը սահմանադրություններն են, որոնք ստեղծվել են պուչիստների կողմից 1960-ականներին»,- ասել է Էրդողանը՝ հավելելով, որ նոր Սահմանադրության մշակման աշխատանքները տարվելու են ժողովրդի առաջ ու նրա բոլոր ներկայացուցիչների մասնակցությամբ՝ նախքան հանրության դատին ներկայացվելը։
Թուրքիայի գործող Սահմանադրությունն ընդունվել է 1982 թվականին՝ 1980-ի ռազմական հեղաշրջումից հետո անցկացված հանրաքվեի արդյունքում։
Նշենք նաև, որ 2017 թվականին Թուրքիայում սահմանադրական փոփոխությունների հանրաքվե անցկացվեց, որի արդյունքում երկիրը խորհրդարանականից անցավ նախագահական կառավարման համակարգի, իսկ 2018 թվականի արտահերթ նախագահական ընտրություններում Էրդողանը ընտրվեց Թուրքիայի նախագահ։
Էմմա Չոբանյան
