Մեդվեդևը՝ ԼՂ-ի կարգավիճակի խնդրի և հակամարտության հարցը Թուրքիայի հետ քննարկելու անհրաժեշտության մասին

Լեռնային Ղարաբաղի կարգավիճակի հարցը չի լուծվել, բայց այն հիմա քննարկել պետք չէ, ավելի լավ է թողնել ապագային։ Այս մասին հայտարարել է ՌԴ Անվտանգության խորհրդի նախագահի տեղակալ Դմիտրի Մեդվեդևը, գրում է ՌԻԱ Նովոստին։

Ռուսական լրատվամիջոցներին տված հարցազրույցում Մեդվեդևը նշել է, որ ժամանակին շատ ժամանակ է ծախսել իր գործընկերների հետ այդ հարցի քննարկման համար։

«Իմ կարծիքով՝ այսօր բոլորի համար ակնհայտ է, որ կարգավիճակի հարցն իսկապես լուծված չէ, բայց դա հիմա չպետք է քննարկել, հիմա դա անել հնարավոր չէ։ Կողմերի դիրքորոշումներն այստեղ շատ խիստ տարբերվում են, նույնիսկ Հայաստանի ներսում կան քննարկումներ»,- ասել է Մեդվեդևը։

Նա ևս շեշտել է՝ Հայաստանն ինքն էլ չի ճանաչել Լեռնային Ղարաբաղի անկախությունը։

«Այդ մասին, չգիտես ինչու, մոռանում են, բայց դա այդպես է։ Դրա համար ավելի լավ է կարգավիճակի հարցը թողնել ապագային»,- հավելել ՌԴ ԱԽ նախագահի տեղակալը։

Բացի այդ՝ Մեդվեդևն ասել է, որ ԼՂ հակամարտության հարցը պետք է քննարկել նաև Թուրքիայի հետ, այդպիսին են տարածաշրջանային իրողությունները։

«Թուրքիան մեր հարևանն է և շատ կարևոր գործընկերը, և շատ մտերիմ երկիր Ադրբեջանի համար։ Այդ փաստը հաշվի չառնել հնարավոր չէ»,- հայտարարել է Մեդվեդևը՝ պատասխանելով ԼՂ հակամարտությունում Թուրքիայի դերակատարման վերաբերյալ հարցին։

Նրա խոսքով՝ Մոսկվան ու Անկարան արդյունավետ երկխոսություն են կառուցել, երկու երկրների նախագահները մշտապես շփվում են այդ թեմայով, որոշում է կայացվել ստեղծել հատուկ մշտադիտարկման կենտրոն։

«Դա նույնպես ընդհանուր կայունության տարր է։ Բայց ես դա չէի գնահատի որպես երկարաժամկետ քաղաքականության տարր կամ չեմ կառուցի դավադրության տեսություններից մեկը։ Ուղղակի մենք պետք է հաշվի առնենք իրողությունները, որոնք գոյություն ունեն մեր տարածաշրջանում։ Իսկ իրողությունն այն է, որ այդ հարցն անհրաժեշտ է քննարկել նաև Թուրքիայի գործընկերների հետ»,- ասել է Մեդվեդևը։

Էմմա Չոբանյան