17.09.2026 | 11:16
Կիևում ռուսական հարձակման հետևանքով տուժել է 16 մարդ, Օդեսայում ՝ բնակելի շենք վնասվել
ԵԽԽՎ նստաշրջան․ հայկական պատվիրակության տապալո՞ւմ, թե՞ օրինաչափություն. ՏԵՍԱՆՅՈՒԹ
Քաղաքականություն
29.01.2021 | 21:43
Հունվարի 25-ին մեկնարկեց ԵԽԽՎ ձմեռային նստաշրջանը։ Հայկական պատվիրակության համար այն նպաստավոր համարել, թերևս, չի կարելի։ Հայ պատգամավորներին չհաջողվեց ռազմագերիների վերադարձի հարցը մտցնել ԵԽԽՎ նստաշրջանի օրակարգ, ինչպես նաև հասնել այն բանին, որ մոնիթորինգային հանձնաժողովի զեկույցում սանձազերծված պատերազմի համար Ադրբեջանին մեղադրող ձևակերպումներ տեղ գտնեն։ Հայաստանյան տիրույթում, հատկապես՝ ընդդիմադիր դաշտում, պատվիրակության աշխատանքը սուր քննադատության արժանացավ։ Անգամ ձևակերպումներ եղան, թե պատվիրակությունը տապալել է աշխատանքը։
Ըստ «Լուսավոր Հայաստան» խմբակցության պատգամավոր Կարեն Սիմոնյանի՝ իրենց ուժը, ի դեմս Էդմոն Մարուքյանի, կարողացել է առավելագույն ջանքեր գործադրել, որպեսզի կարևոր հարցերի մասին բարձրաձայնվի, իսկ խնդիրը ԵԽԽՎ պատվիրակության կազմում ներառված իշխանական պատգամավորների մեջ է։ «Ռուբինյանը շուտվանից է տապալել ԵԽԽՎ-ում աշխատանքը և եթե չլիներ ԼՀ ներկայացուցիչը, իմ կարծիքով՝ պատվիրակությունը չէր կարողանալու արդյունավետ աշխատել։ Պարոն Ռուբինյանն այնտեղ զուտ տեխնիկական աշխատանք է կատարում, գնում, ներկայացնում Հայաստանը, բայց շոշափելի արդյունք չի կարողանում ստեղծել»,-նշեց նա։
Իշխող «Իմ քայլի» պատգամավոր Արուսյակ Ջուլհակյանը համամիտ չէ ընդդիմության տեսակետներին։ Նա կարծում է՝ աշխատանքը պատշաճ է արվել։
«Բնականաբար, չեմ կարծում, որ ԵԽԽՎ-ում աշխատանքը տապալվել է։ Ինչ վերաբերում է ԼՀ-ի մեղադրանքներին, պետք է նշեմ, որ «Լուսավոր Հայաստանն» այնտեղ ամենաբարձր մակարդակով ներկայացված է՝ խմբակցության ղեկավար Մարուքյանը և վերընտրվեց բավական կարևոր հանձնաժողովի նախագահի տեղակալ։ Եվ եթե ԼՀ-ն ասում է, որ պատվիրակությունը ձախողել է, պետք է խոսի այն մասին, որ իր անդամն է ձախողել»,- նշեց Ջուլհակյանը։
Լայն քննարկման առիթ դարձավ նաև ԲՀԿ-ական պատգամավոր Միքայել Մելքումյանի ելույթը։ Հիշեցնենք՝ պատգամավորն անդրադարձ էր կատարել ՌԴ-ում առկա իրավիճակին, մինչդեռ քննադատություններ հնչեցին, թե նա պետք է մեր գերիների խնդիրների մասին բարձրաձայներ, ոչ թե խոսեր Ռուսաստանին առնչվող հարցերից։ Մելքումյանը հրաժարվեց մեկնաբանել քննադատությունները։
Մանրամասները՝ տեսանյութում:
Մերի Մարտիրոսյան
