27.06.2026 | 12:48
Գտնում եմ, որ ողջ ՀՀ-ում պետք է վերաքվեարկություն նշանակվի, անվավեր ճանաչվի այս ընտրությունը․ Օրբելյան․ ՏԵՍԱՆՅՈՒԹ
Ադրբեջանում դժգոհ են՝ ՅՈՒՆԵՍԿՕ-ն ու Ֆրանսիան ավելի շատ մտահոգված են Արցախի քրիստոնեական հուշարձանների խնդրով
Մշակույթ
27.01.2021 | 20:27
Ադրբեջանում շարունակում են դժգոհություններ հայտնել ՅՈՒՆԵՍԿՕ-ից ու ամեն կերպ խոչընդոտել կառույցի առաքելության մուտքը Լեռնային Ղարաբաղ։ Այս անգամ էլ դժգոհություն է հայտնել Ադրբեջանի մշակույթի նախարար Անար Քերիմովը։
Մասնավորապես, Ֆրանսիայի Եվրոպայի ու արտաքին գործերի նախարարության պետական քարտուղար Ժան Բատիստ Լեմուանի հետ հանդիպմանը քննարկվել է նաև Լեռնային Ղարաբաղում ՅՈՒՆԵՍԿՕ-ի առաքելության հարցը։ Լեմուանն ասել է, որ այցի նպատակն ադրբեջանական կողմի հետ մտքերի փոխանակումն ու երկկողմ հարաբերությունների զարգացման հիմք ստեղծելն է։ Նա անդրադարձել է նաև ԼՂ-ում ՅՈՒՆԵՍԿՕ-ի առաքելությանը։
Քերիմովն իր հերթին նշել է, որ այդ հարցի շուրջ բանակցությունները շարունակվում են ՅՈՒՆԵՍԿՕ-ի հետ, և որ անկախ փորձագետների առաքելությունը պիտի իրականացվի՝ Ադրբեջանի տարածքային ամբողջականությունն ու ինքնիշխանությունը հարգելով։ Ադրբեջանցի նախարարը նաև ափսոսանք է հայտնել, որ «Ֆրանսիան ու ՅՈՒՆԵՍԿՕ-ն ավելի շատ մտահոգված են Ղարաբաղում քրիտոնեական հուշարձաններով, մինչդեռ ոչինչ չի ասվում տարածաշրջանի իսլամական ժառանգության մասին»։
Նշենք, որ օրերս էլ Ադրբեջանի մշակույթի նախարարությունից լրատվամիջոցներից մեկի հարցմանն ի պատասխան ասել էին, որ ՅՈՒՆԵՍԿՕ-ի հետ բանակցությունները շարունակվում են։
«Առաքելության ժամանակը դեռ որոշված չէ։ Դրա հետ կապված համատեղ քննարկումներ են ընթանում ԱԳՆ-ի, ՅՈՒՆԵՍԿՕ-ում Ադրբեջանի մշտական ներկայացուցչության ու Մշակույթի նախարարության միջև»,- ասվում է հաղորդագրության մեջ։
Հավելենք, որ Ադրբեջանի բաձրաստիճան պաշտոնյաները՝ սկսած նախագահ Իլհամ Ալիևից, պարբերաբար տարբեր մեղադրանքներ են հնչեցնում ՅՈՒՆԵՍԿՕ-ի հասցեին և փորձում ամեն կերպ խոչընդոտել կառույցի անկախ փորձագետների մուտքը Լեռնային Ղարաբաղ։
Էմմա Չոբանյան
