19.05.2026 | 18:27
«Իշխանական պատվեր է». Նարեկ Կարապետյանը՝ ФСБ-ի և Սամվել Կարապետյանի կապն արձանագրած հետաքննության մասին․ ՏԵՍԱՆՅՈՒԹ
Գնաճի մեղմման հնարավորություն կլինի, եթե բնակչությանն ազատեք գազի, էլեկտրաէներգիայի ու ջրի գծով ավելացված արժեքի հարկից. Ա. Մանուկյան
Տնտեսություն
23.01.2018 | 17:08
Տնտեսագետ Արտակ Մանուկյանն այսօր թանկացումների վերաբերյալ հրավիրված խորհրդարանական լսումներին իր ելույթը սկսեց երեք հիմնական շեշտադրումներով:
«Առաջինը մեթոդաբանական, որովհետև այստեղ թվերից շատ խոսվեց և այնպիսի տպավորություն է, որ ոչ ոք ԱՎԾ-ի մեթոդաբանությունը չի կարդում: Առաջինը՝ ասեմ, որ եթե նախկինում 470 ապրանք և ծառայություն էր, որն, ըստ էության, 1042 ներկայացուցչական ապրանք էր, ապա 2017 թվականի փետրվարի զեկույցը նայելով տեսնում ենք, որ մեթոդաբանությունը փոխվել է՝ դառնալով 452 ապրանք և ծառայություն, շուրջ 4000 ներկայացուցչական ապրանքներով »,- նշեց տնտեսագետը՝ նկատելով, որ ընդհանուր առմամբ այդ ամենում խնդիր չի տեսնում:
Տնտեսագետի խոսքով՝ Հայաստանում հիմնական սպառման 24 ապրանք կա, որոնցից շուրջ 14-ի դեպքում առկա է գնային բարձրացում: «Վեցի մասով կա գնային նվազեցում՝ շաքարավազը և այլն: Մեծ հաշվով հասկանում ենք, նաև ակնհայտ է՝ եթե ունես տնտեսական աճ, պետք է ունենաս գնաճ, բայց սրա հիմքերը պետք է փորձենք հասկանալ»,- շեշտեց Արտակ Մանուկյանը:
Տնտեսագետը թանկացումների հետևանքների մեղմման համար առաջարկով հանդես եկավ: «Օրինակ նայում ենք էներգակիրները՝ գազ, էլեկտրաէներգիա, ջուր, հիմնական բեռը կրում է բնակչությունը: Եկեք մի անգամ ընդառաջեք այս հասարակությանը, փորձեք ավելացված արժեքի հարկից հանել իմ նշած այս երեք ուղղությունները»,- կոչ արեց տնտեսագետը:
Մանրամասները՝ տեսանյութում:
