Ադրբեջանի հերթական կեղծիքը․ աղավաղել են ԼՂ-ում սիրիացի վարձկանների մասին Գերմանիայի ԱԳ նախարարի խոսքերը

Երեկվանից ադրբեջանական լրատվամիջոցները լուրեր են տարածում, թե Գերմանիայի ԱԳ նախարար Հայկո Մասսը ԵԽԽՎ-ում հայ պատգամավոր Ռուբեն Ռուբինյանի հարցի պատասխանելիս հերքել է, թե Ադրբեջանի կողմից Արցախյան պատերազմում սիրիացի վարձկաններ են կռվել։

Գերմանիայի ԱԳ նախարարի պատասխանին կարելի է ծանոթանալ ԵԽԽՎ պաշտոնական կայքում, որտեղից պարզ է դառնում, որ նա, հակառակը, հաստատել է, որ սիրիացի վարձկաններ են կռվել Արցախյան պատերազմում։

Մաասը, մասնավորապես, ասել է հետևյալը․ «Ինչ վերաբերում է Լեռնային Ղարաբաղի հակամարտությունում սիրիացի վարձկանների հարցին, մենք տեղյակ ենք զեկույցներից, որ սիրիացի վարձկաններն օգտագործվել են Հայաստանի ու Ադրբեջանի միջև կոնֆլիկտում։ Մենք նաև պիտի նշենք, որ սա առաջին հակամարտությունը չէ, որում սիրիացի վարձկանները դեր են խաղում․ գիտենք սա Լիբիայի քաղաքացիական պատերազմից։ Ինչ վերաբերում է Լեռնային Ղարաբաղին, ապա հիմնվելով ներկա հետախուզական տվյալների վրա՝ մենք կարող ենք ենթադրել, որ այդ սիրիացի վարձկանները դեռ գտնվում են հակամարտության գոտում։ Միջազգային շատ ջանքեր են գործադրվում՝ հասկանալու, թե ինչպես են նրանք այնտեղ օգտագործվում, որքան է նրանց թիվը և ով է պատասխանատու դրա համար։ Մինչև վերջ դա չի պարզաբանվել։ Թուրքիան կարևոր դեր է խաղում այս հակամարտությունում Ադրբեջանի վրա ազդեցության տեսակետից։ Մենք արդեն Թուրքիայի կառավարությանը հասկացրել ենք, որ Թուրքիան կարող է օգտագործել իր այս ազդեցությունը ԼՂ-ի հակամարտությունում՝ տարածաշրջանում անվտանգության ու կայունության ապահովման բարձրացման գործում»։

Էմմա Չոբանյան