Իսրայելը հավակնում է դառնալ կորոնավիրուսը հաղթահարած առաջին երկիրը․ պատվաստումների արդյունքները հուսադրող են․ NYT

Իսրայելը դարձել է կորոնավիրուսի դեմ պատվաստումների առաջատար, իսկ երկրի մասշտաբներով պատվաստանյութի զանգվածային կիրառման առաջին արդյունքները չափազանց հուսադրող են։ Այս մասին գրում է The New York Times -ը՝ հղում կատարելով Իսրայելի հանրային առողջապահության ոլորտի փորձագետներին։

Իսրայելը, որտեղ տարեց բնակչության ավելի քան 40%-ն արդեն ստացել են Pfizer-BioNTec ընկերությունների պատվաստանյութի առաջին չափաբաժինը, դարձել է, այսպես կոչված, միջազգային «փորձադաշտ», որը կոչված է ապացուցելու պատվաստման արդյունավետությունը։ Երկիրը պատվաստումները սկսել է կատարել դեկտեմբերի 20-ից՝ հասցնելով առաջին չափաբաժնի պատվաստումն անել ավելի քան 2,6 միլիոն մարդու, իսկ անհրաժեշտ երկրորդ չափաբաժին պատվաստանյութն արդեն ստացել է ավելի քան 1 միլիոն մարդ։

Պատվաստումների նման արագության հաջողվել է հասնել շնորհիվ պատվաստանյութ արտադրող ընկերության հետ համաձայնության։  Հունվարի 7-ին երկրի վարչապետ Բինյամին Նեթանյահուն հայտարարել է, որ պայմանավորվել է Pfizer ընկերության հետ այն մասին, որ մինչ 2021 թվականի մարտի վերջ 16 տարեկանից բարձր բոլոր իսրայելացիները կկարողանան ստանալ պատվաստումը։ Նեթանյահուն հայտարարել է, որ համաձայնագրի շրջանակում Իսրայելը կդառնա «մի ամբողջ երկիր արագ պատվաստելու միջազգային մոդել»։

Պատվաստման գործընթացի արագացման հարցում օգնել են նաև երկրի զինված ուժերը, պատվաստման կենտրոններում աշխատում են  պահեստազորում գտնվող շուրջ 700 ռազմական բժիշկներ։ «Մենք կլինենք կորոնավիրուսը հաղթահարող առաջին երկիրը», – խոստացել է Նեթանյահուն Pfizer- ի հետ համաձայնագիրը ստորագրելուց հետո:

Ըստ Իսրայելի Առողջապահության նախարարության՝ պատվաստանյութի երկրորդ չափաբաժինը ստացած 428,000 իսրայելցիներից միայն 63 մարդ կամ 0,014% -ն է պատվաստվելուց մեկ շաբաթ անց վարակվել կորոնավիրուսով: Երկրորդ չափաբաժինը ստանալուց ավելի քան մեկ շաբաթ անց, 129 հազար  մարդուց կորոնավիրուսով վարակվել է ընդամենը 20 մարդ կամ 0,01% -ը:

Տաթև Ֆռանգյան