17.04.2026 | 18:07
ՄԻՊ ներկայացուցիչներն արագ արձագանքման այց են իրականացրել Ոստիկանության բաժիններ
«Մարդիկ մեղավոր չեն, տուն-տեղ են կորցրել, պետք է նրանց տեր կանգնել»․ Շուշիի քաղաքապետ. ՏԵՍԱՆՅՈՒԹ
Հասարակություն
25.01.2021 | 15:09
Արցախի ժողովուրդն իր համար անսպասելի կերպով բախվել է բազմաթիվ խնդիրների: Մարդիկ թողել են իրենց ունեցած ամեն ինչ և տեղափոխվել Հայաստան: Այս մասին այսօր հրավիրված ասուլիսում նշեց Շուշիի քաղաքապետ Արծվիկ Սարգսյանը:
Նրա խոսքով՝ նրանցից շատերի մոտ մնացել են միայն այն իրերը, որոնք նրանց հագին են եղել: «Մարդիկ պարզապես չգիտեին՝ ինչ է կատարվում: Նրանք մտածում էին, թե մեկնում են մի քանի օրով, և որ նրանց հարցերը կլուծվեն, և նրանք կվերադառնան իրենց տներ: Սակայն, ցավոք, դա տեղի չունեցավ»,-ասաց Սարգսյանը:
Նրա խոսքով՝ խնդիրները շատ են: Դրանք կապված են և՛ կենցաղային անբարենպաստ պայմանների, և՛ ուտելիքի, և՛ հագուստի հետ: «Այո, կան բարեգործական կազմակերպություններ, բարի մարդիկ, սակայն դա այն չէ, ինչ նրանց պետք է: Դա, ցավոք, բավարար չէ»,-նկատեց Սարգսյանը:
Նրա խոսքով՝ Հայաստանում բնակարան վարձելը աստղաբաշխական գումար է փախստականների համար: Պետությունը, իհարկե այդ մասով ֆինանսական աջակցություն է ցուցաբերում, սակայն հատկացված միջոցները բավարար չեն: «Կա ծրագիր, ըստ որի՝ Ղարաբաղից փախստականներին հատկացնում են 68 հազար դրամ, ապա ևս 15 հազար դրամ: Սակայն այդ պետական ծրագիրը ինչ-ինչ պատճառով չի տարածվում 18-58 տարեկան տղամարդկանց վրա: Այո, ես մի քանի անգամ բարձրացրել եմ այդ հարցը, բայց ասել են՝ թող տղամարդիկ գնան, աշխատեն: Որտե՞ղ պետք է աշխատեն, աշխատանք չկա»,-ասաց Սարգսյանը
«Մարդիկ մեղավոր չեն, տուն-տեղ են կորցրել, պետք է նրանց տեր կանգնել»-ասաց քաղաքապետը: Նա նաև հավելեց, որ աջակցության ծրագրերը պետք է պետականորեն կարգավորվեն:
Մանրամասները՝ տեսանյութում:
