16.12.2025 | 20:19
«Առանց հանգստյան օրերի». երբ պատրաստ կլինեն 300 դպրոցները և Ակադեմիական քաղաքը՝ ըստ Անդրեասյանի
Էրդողանը քննադատել է ՆԱՏՕ-ի դաշնակիցներին՝ Թուրքիային «Բայրաքթար»-ների տեսախցիկներ չվաճառելու համար
Քաղաքականություն
25.01.2021 | 14:50
Թուրքիայի նախագահ Ռեջեփ Թայիփ Էրդողանը քննադատել է ՆԱՏՕ-ի դաշնակիցներին, նրանց անվանել «վատ հարևաններ»՝ թուրքական ԱԹՍ-ի համար արտադրամասերի մատակարարումից հրաժարվելու համար։ Այս մասին գրում է Ahval գործակալությունը՝ վկայակոչելով Duvar-ը։
«Չնայած մեր դեմ զրպարտանքների բոլոր արշավներին՝ մեր թռչող սարքերով հիանում է ամբողջ աշխարհը։ Թուրքական ԱԹՍ-ները փոխեցին պատերազմի վարման մեթոդները և փոխեցին պատերազմի ելքը Լիբիայում»,- ասել է Էրդողանը։
ՆԱՏՕ-ի դաշնակիցներին անվանելով «վատ հարևաններ»՝ Էրդողանը հավելել է, որ նրանք հրաժարվել են մասերի մատակարարումից, հատկապես ԱԹՍ-ների տեսախցիկների, այդ պատճառով Թուրքիան պիտի ավելի շատ պահեստամասեր արտադրի երկրի ներսում։
«Օրինակ՝ տեսախցիկների խնդիրը։ Մենք միասին ենք ՆԱՏՕ-ում։ Մենք տեսախցիկներ ենք ուզում, բայց նրանք չեն տալիս։ Մեզ ասում են՝ «Ինչո՞ւ եք կռվում Հայաստանում»։ Հայաստանը հարձակվել է իմ դաշնակցի վրա, մենք պետք է մեր բոլոր հնարավոր աջակցությունը ցույց տանք։ Արդյո՞ք մենք ՆԱՏՕ-ում միասին չենք»,- հարցադրում է հնչեցրել Էրդողանը։
Երբ Արցախյան պատերազմում Թուրքիան սկսեց բացահայտ ռազմական աջակցություն ցուցաբերել Ադրբեջանին, մի շարք երկրնե դադարեցրին Անկարային «Բայրաքթար» անօդաչուների արտադրամասեր մատակարարել։
Վերջերս Andair բրիտանական ընկերությունը Մեծ Բրիտանիայում Հայաստանի դեսպանատան դիմումից հետո հայտարարեց, որ այլևս թուրքական անօդաչուների համար մասեր չի մատակարարում։
Անցյալ հոկտեմբերին էլ կանադական Bombardier Recreational Products ընկերությունն էր հայտարարել, որ կասեցնում է շարժիչների վաճառքը թուրքական անօդաչուների համար։ Սա հաջորդել էր Կանադայի կառավարության՝ Լեռնային Ղարաբաղում պատերազմի պատճառով զենքի արտահանման դադարեցման որոշմանը։
Էմմա Չոբանյան
