Արցախը պետք է ապաշրջափակել. վարդենիսցիներն այս հարցը բարձրացնելու համար ճանապարհներ են փակելու. Թագուհի Թովմասյան. ՏԵՍԱՆՅՈՒԹ

Վարդենիս-Քարվաճառ ավտոճանապարհը բացելու պահանջով քաղաքացիներն առաջիկայում նույնպես Դրմբոնի օրինակով ճանապարհներ կփակեն՝ իրենց բողոքը իշխանություններին լսելի դարձնելու համար։ Այս մասին ԱԺ-ում լրագրողների հետ զրույցում հայտնեց անկախ պատգամավոր Թագուհի Թովմասյանը` հավելելով, որ Մարտունու, Վարդենիսի, Ճամբարակի շատ բնակիչներ դիմել են իրեն, դժգոհություն են հայտնել ու նաև ասել են, որ պլանավորում են առաջիկայում փակել բոլոր հնարավոր ավտոճանապարհները և իրենց բողոքի ձայնը բարձրացնել, որպեսզի Հայաստանի իշխանությունը կարողանա, տեղից շարժվի ու բարձրաձայնի Վարդենիս-Քարվաճառ ավտոճանապարհի հարցը:

Պատգամավորի խոսքով՝ մինչ Հայաստանի իշխանությունները փաստաթղթեր են ստորագրում տարածաշրջանային ապաշրջափակման վերաբերյալ, Արցախը մնում է շրջափակման մեջ, և դա, հատկապես, խնդիրներ է ստեղծում այն քաղաքացիների համար, որոնք աշխատում են Արցախում և նախկինի փոխարեն պետք է մի քանի անգամ երկար ճանապարհից օգտվեն Արցախ հասնելու համար։

«Արցախը գտնվում է շրջափակման մեջ։ Շատ մարդիկ Արցախում են աշխատում՝ հանքարդյունաբերության, շինարարության։ Նախկինում 80 կմ էր ճանապարհը, տեղ էին հասնում, հիմա 300-400 կմ պետք է անցնեն։ Սա օրհասական խնդիր է, օր առաջ պետք է բարձրաձայնվի։ Հետպատերազմյան շրջանում ամենակարևոր խնդիրներից պետք է լինի Քարվաճառի ավտոճանապարհի վերագործարկումը։ Այդ հարցը պետք է բարձրացված լիներ միջպետական մակարդակով և պետական կառույցների կողմից, ինչը չի արվել»,- նշեց պատգամավորը՝ հավելելով, որ այս հարցի առնչությամբ պատրաստվում է գրությամբ դիմել ԱԳՆ։

Մանրամասները՝ տեսանյութում: