Քաղաքականություն
22.01.2021 | 11:47
ԱՄՆ նորընտիր նախագահ Ջո Բայդենի կողմից պետքարտուղարի թեկնածու առաջադրված Էնթոնի Բլինքենը, նախքան Սենատի արտաքին հարաբերությունների հանձնաժողովում լսումները, գրավոր հաստատել է, որ աջակցելու է ԱՄՆ կողմից Հայաստանում ու Լեռնային Ղարաբաղում շարունակվող մարդասիրական ճգնաժամի կարիքները հոգալու համար ֆինանսավորմանը։ Այս մասին հայտնում է ԱՄՆ Հայ դատի հանձնախումբը (ANCA)։
Մասնավորապես Արտաքին հարաբերությունների հանձնաժողովի նախագահ Ռոբերտ Մենենդեսի կողմից ներկայացված հարցերին տրված չորս մանրամասն գրավոր պատասխաններում Բլինքենն իր աջակցությունն է հայտնել «Հայաստանին անվտանգության հարցում աջակցություն ցուցաբերելուն և ժողովրդավարական կառավարման ամրապնդման և տնտեսական աճի խթանմանն ուղղված օգնությանը, որոնք երկուսն էլ օգնելու են ամրապնդել Հայաստանի անվտանգությունն ու կայունությունը»: Վերջինս նաև հավելել է, որ «Լեռնային Ղարաբաղում վերջերս գրանցված ռազմական գործողությունների ֆոնին մեր վարչակազմը կվերանայի Ադրբեջանին հատկացվող անվտանգության աջակցությունը»։
Բլինքենն իր երեք պատասխաններում ընդգծել է իր նվիրվածությունը «աշխատել Կոնգրեսի և պաշտպանության նախարարի հետ` որոշելու Հայաստանի և տարածաշրջանի անվտանգության կարիքները բավարարելու համար հատկացվող աջակցության չափը»:
Անդրադառնալով ԵԱՀԿ Մինսկի խմբում ԱՄՆ գործունեության մասին Մենենդեսի հարցին ՝վերջինս նշել է․ «Նախագահն ասել է, որ ԱՄՆ-ը պետք է առաջնորդի դիվանագիտական ջանքերը՝ հակամարտությանը հարատև լուծում գտնելու համար՝ աշխատելով մեր եվրոպացի գործընկերների հետ: Հաստատվելու դեպքում ես նոր թափ կհաղորդեմ ԱՄՆ-ի ներգրավվածությանը այնպիսի մշտական լուծում գտնելու համար, որը կապահովի Լեռնային Ղարաբաղի անվտանգությունը և կօգնի երաշխավորել, որ նոր պատերազմ չի բռնկվի: Սա ներառում է մեր ակտիվացումը Մինսկի խմբի շրջանակում և լրացուցիչ դիվանագիտական աշխատանք՝ երրորդ կողմի ցանկացած նոր միջամտությունը կանխելու համար», – ասել է ԱՄՆ Պետքարտուղարության ապագա ղեկավարը:
Տաթև Ֆռանգյան
