19.05.2026 | 23:56
Հայաստանի մի շարք հասցեներում էլեկտրաէներգիայի անջատումներ կլինեն
Վրաստանի ու Ադրբեջանի միջև վիճելի վանական համալիրի շուրջ հետաքննությունն ավարտվել է
Քաղաքականություն
21.01.2021 | 19:12
Վրաստանի գլխավոր դատախազությունն ավարտել է Դավիթ Գարեջիի վանական համալիրի հետ կապված գործի հետաքննությունը։ Այս մասին հայտնել է դատախազ Ամիրան Գուլուաշվիլին, գրում է Грузия online-ը։
Ինչպես նշել է Գուլուաշվիլին, այժմ գործը քննվելու է Թբիլիսիի քաղաքային դատարանում։
«Վրաստանի գլխավոր դատախազությունն ավարտել է մեղադրյալներ Իվերի Մելաշվիլիի ու Նատալյա Իլյիչևայի հանդեպ հետաքննությունը Վրաստանի տարածքի մի մասը օտար պետության փոխանցելու ուղղությամբ։ Գործը կքննվի Թբիլիսիի քաղաքային դատարանում։ Քրեական գործով հարյուրավոր հետաքննչական գործողություններ են իրականացվել։ Որպես վկա հարցաքննվել է 100 մարդ։ Կառավարական տարբեր գերատեսչություններում առգրավել են գործի համար կարևոր փաստաթղթեր, ներառյալ քարտեզագրական նյութեր:
«1937-1938 թվականների 1/200 000 մասշտաբի տեղագրական բնօրինակ քարտեզը հայտնաբերվել է Նատալյա Իլիչևայի աշխատասենյակում կատարված քննչական գործողությունների արդյունքում»,- ասել է Գուլուաշվիլին։
Հավելենք, որ Դավիթի Գարեջիի վանական համալիրը գտնվում է վրաց-ադրբեջանական սահմանին և այս համալիրի շուրջ տարածքային անհամաձայնություն կա երկու երկրների միջև։ Այժմ սահմանային վանական համալիրի մի մասը գտնվում է Վրաստանի, մյուս մասը՝ Ադրբեջանի վերահսկողության ներքո:
Տաթև Ֆռանգյան
