11.12.2024 | 23:30
Թուրքիան Մեծ Բրիտանիայից շահագործումից հանված Super Hercules ռազմատրանսպորտային ինքնաթիռներ կգնի
Բոբ Մենենդեզը մտահոգություններ է հայտնել Թուրքիայի վերաբերյալ, նշել Հայոց ցեղասպանության մասին ճշմարտությունը խոսելու կարևորությունը
Քաղաքականություն
20.01.2021 | 21:47
Ս.թ. հունվարի 19-ին Միացյալ Նահանգների Սենատի Արտաքին հարաբերությունների հանձնաժողովը անցկացրել է Էնթոնի Բլինկենի թեկնածությունն ԱՄՆ Պետական քարտուղարի պաշտոնում հաստատելու հարցով լսումներ. հայտնում է Ամերիկայի հայկական համագումարը:
«Ավելի քան չորս ժամ տևած լսումների ընթացքում սենատորները բարձրաձայնեցին հարցերի լայն շրջանակ` ժողովրդավարությունից ու մարդու իրավունքներից մինչև Ռուսաստանի, Իրանի ու Թուրքիայի մասին մտահոգություններ, ի թիվս ամերիկյան քաղաքականության այլ առաջնահերթությունների:
Եկող գումարման հանձնաժողովի նախագահ ու ներկայիս ավագ անդամ, Սենատոր Բոբ Մենենդեզը (Դեմոկրատ, Նյու Ջերսի) հույս հայտնեց, որ նորընտիր նախագահ Բայդենը հետամուտ կլինի Հայոց ցեղասպանության մասին ճշմարտությունը ճանաչելու իր խոստմանը:
«Մենք ողջունում ենք Սենատոր Մենենդեզին՝ ԱՄՆ կողմից Հայոց ցեղասպանությունը հաստատելու հարցում իր առաջնորդության համար»,– հայտատարեց Համագումարի գործադիր տնօրեն Բրայան Արդունին: «Մենք հորդորում ենք Բայդենի գալիք վարչակազմին հավատարիմ մնալ ԱՄՆ կողմից Հայոց ցեղասպանության ճանաչման հարցում իրենց ստանձնած պարտավորություններին և աջակցել Հայաստանին և Արցախին՝ հատկապես Ադրբեջանի կողմից սանձազերծած վեցշաբաթյա պատերազմին հաջորդող շրջանում»,– շարունակեց Արդունին:
Սենատոր Մենենդեզը նաև մտահոգություններ հայտնեց Կիպրոսում, Հունաստանում և Արևելյան Միջերկրականում Թուրքիայի ապակայունացնող գործողությունների, վերջինիս կողմից ռուսական S-400 հակաօդային պաշտպանության համակարգի գնման և «Լեռնային Ղարաբաղում (Արցախ) Ադրբեջանի ագրեսիային» աջակցելու վերաբերյալ: Բացի այդ, Սենատորը հայտատարեց, որ հավատացած է, որ Ադրբեջանը ռազմական հանցագործություններ կատարեց»,- ասված է Ամերիկայի հայկական համագումարի տարածած հաղորդագրությունում:
