19.12.2025 | 03:00
Կոնֆերենցիաների լիգա. «Նոայի» հավանական մրցակիցները փլեյ-օֆֆում
ԱՄՆ պետքարտուղարի թեկնածուն Թուրքիային անվանել է «դաշնակից, որը չի գործում դաշնակցի պես»
Քաղաքականություն
20.01.2021 | 16:26
ԱՄՆ պետքարտուղարի թեկնածու Էնթոնի Բլինքենը Սենատի արտաքին հարաբերությունների հանձնաժողովում լսումների ժամանակ ասել է, որ Թուրքիայի գործողությունները, որպես ՆԱՏՕ-ի դաշնակից, անընդունելի են՝ նկատի ունենալով Ռուսաստանից S-400-ների գնումը, գրում է Ahval-ը։
Բլինքենը նաև նշել է, որ վարչակազմը կքննարկի՝ պետք է անել ավելին և նոր պատժամիջոցներ կիրառել։
«Այն, որ մեր, այսպես ասած, ռազմավարական գործընկերը կապեր ունի մեր ռազմավարական ամենամեծ մրցակիցներից մեկի՝ Ռուսաստանի հետ, անընդունելի է»,- ասել է Բլինքենը՝ պատասխանելով S-400-ների հետ կապված սենատոր Լինդսի Գրեհեմի հարցին։
«Կարծում եմ, որ մենք պետք է հասկանանք՝ ինչ ազդեցություն են ունեցել առկա պատժամիջոցները, և հետո որոշենք՝ ի՞նչ պետք է անել ավելին»,- ասել է պետքարտուղարի թեկնածուն։
Ի դեպ, Սենատի հանձնաժողովում քննարկման ժամանակ անդրադարձ է եղել նաև Արցախյան պատերազմում Թուրքիայի գործողություններին։ Սենատոր Բոբ Մենենդեսը խոսել է տարածաշրջանում Անկարայի «ապակայունացնող» գործողությունների մասին՝ Սիրիայում, Կիպրոսի բացառիկ տնտեսական գոտում, Լիբիայում, ինչպես նաև Լեռնային Ղարաբաղի վերջին պատերազմում Ադրբեջանին աջակցությունը, որի ընթացքում ադրբեջանցիների կողմից իրականացվել են նաև ռազմական հանցագործություններ։
«Մենք ունե՞նք հստակություն Թուրքիայի մասին՝ Էրդողանի օրոք»,- հարցրել է Մենենդեսը։ Բլինքենը պատասխանել է՝ «Թուրքիան դաշնակից է, որը շատ դեպքերում չի գործում այնպես, ինչպես պիտի գործի դաշնակիցը»։ «Սա մեզ համար շատ կարևոր մարտահրավեր է, և մենք շատ հստակ ենք այդ հարցում»,- հավելել է նա։
Էմմա Չոբանյան
