18.01.2026 | 21:30
Վահագն Խաչատուրյանն այցելել է Ժնևի Սուրբ Հակոբ եկեղեցի
Յոշիհիդե Սուգան հայտարարել է՝ ՌԴ-ի Կուրիլյան կղզիների վրա տարածվում է Ճապոնիայի ինքնիշխանությունը
Քաղաքականություն
20.01.2021 | 15:35
Ճապոնական կողմը բանակցությունների առարկա է համարում ՌԴ Կուրիլյան կղզիների ողջ հարավային հատվածը, ընդ որում այդ տարածքներում, ըստ Տոկիոյի՝ տարածվում է Ճապոնիայի ինքնիշխանությունը։ Նման պնդմամբ է հանդես եկել երկրի վարչապետ Յոշիհիդե Սուգան՝ խորհրդարանում քննարկումների ժամանակ, գրում է ՏԱՍՍ-ը։
«Հյուսիսային տարածքները կղզիներ են, որոնց վրա տարածվում է մեր ինքնիշխանությունը։ Բացի այդ, խաղաղության պայմանագրի վերաբերյալ ՌԴ-ի հետ բանակցությունների առարկա է հանդիսանում բոլոր 4 հյուսիսային կղզիների պատկանելության որոշումը։ Սա մեր կառավարության հետևողական դիրքորոշումն է»,- ասել է նա ընդդիմադիր կուսակցություններից մեկի ղեկավարի հարցին ի պատասխան։
Հիշեցնենք՝ անցյալ դարի կեսերից Մոսկվան ու Տոկիոն ընդհատումներով բանակցում են Երկրորդ համաշխարհային պատերազմից հետո խաղաղության պայմանագրի շուրջ: Դրա վերջնական կնքնման համար հիմնական խոչընդոտ է հանդիսանում Կուրիլյան կղզիների հարավային մասի պատկանելության հարցը: 1945 թվականին ամբողջ արշիպելագը մտցվել է Խորհրդային Միության կազմի մեջ, սակայն Տոկիոն վիճարկում է Իտուրուպի, Կունաշիրայի, Շիկոտանի և այժմ անմարդաբնակ դարձած կղզիների խմբի պատկանելությունը։ Ռուսաստանի արտգործնախարարությունը բազմիցս հայտարարել է, որ այդ տարածքների նկատմամբ Ռուսաստանի ինքնիշխանությունը, որն ունի համապատասխան միջազգային իրավական հիմնավորում, կասկածի տակ չի կարող դրվել:
Տաթև Ֆռանգյան
