Հնդկաստանում կորոնավիրուսի դեմ պատվաստումից հետո բուժաշխատող է մահացել

Հնդկաստանի Ուտար Պրադեշ նահանգի Մորադաբադ քաղաքի բուժաշխատողներից մեկը մահացել է կիրակի երեկոյան՝ կորոնավիրուսային հիվանդության դեմ պատվաստվելուց 24 ժամ անց։ Ինչպես լրագրողներին հայտնել է հիվանդանոցի գլխավոր բժիշկ Գարգը, բժիշկները ենթադրում են, որ, ամենայն հավանականությամբ, մահը վրա է հասել պատվաստման կողմնակի հետևանքների պատճառով, գրում է ՏԱՍՍ-ը։

«Նա պատվաստվել է շաբաթ օրը՝ կեսօրին։ Կիրակի օրը շնչառության հետ դժվարություններ է ունեցել ու գանգատվել է կրծքավանդակի շրջանում ծանրությունից։ Մենք պարզում ենք մահվան պատճառը, դիրահերձում կիրականացվի։ Նրա մահը նման չէ պատվաստումներից հետո ի հայտ եկող ռեակցիային: Պատվաստումից հետո նա շաբաթ գիշերը հերթապահել է, և խնդիրներ չի ունեցել»,- ասել է նա։

Մահացած աշխատակցի հարազատները հաստատել են, որ նա իրեն վատ է զգացել դեռևս նախքան պատվաստումը։ Մահվան պաշտոնական պատճառը «սիրտ-թոքային հիվանդության հետևանքով առաջացած կարդիոլոգիական շոկն է»:

Հավելենք, որ հունվարի 16-ից Հնդկաստանում մեկնարկել է կորոնավիրուսի դեմ համազգային պատվաստումը, որը տեղի իշխանություններն անվանել են աշխարհում ամենազանգվածայինը։ Հնդկաստանում պատվաստումների առաջին փուլն իրականացվում է բրիտանա-շվեդական AstraZeneca ընկերության մշակած Covishield պրեպարատով, ինչպես նաև Bharat Biotech-ի Covaxin պատվաստանյութով։ Այս երկու պատվաստանյութերն էլ արտադրվում են Հնդկաստանի տարածքում։

Տաթև Ֆռանգյան