11.10.2026 | 20:00
15 հազար մարդ Հայաստան է գալիս․ ի՞նչ է սպասվում COP17-ում․ բնությունը մարդուց պաշտպանելու ՇԵՐՏԵՐԸ
Գերմանիայի իշխանությունները թույլատրել են «Հյուսիսային հոսք 2» գազատարի կառուցման աշխատանքները
Քաղաքականություն
15.01.2021 | 16:33
Գերմանիայի Նավարկության և հիդրոգրաֆիայի դաշնային գրասենյակը (BSH) մինչև մայիսի վերջ երկրի ջրերում «Հյուսիսային հոսք 2» գազատարի կառուցման թույլտվություն է տվել: Այս մասին ասվում է կարգավորող մարմնի կողմից ուրբաթ օրը հրապարակված հայտարարության մեջ, փոխանցում է ՏԱՍՍ-ը:
Nord Stream 2 AG-ը՝ «Հյուսիսային հոսք 2» շինարարական ծրագրի շահագործողը, կարող է անմիջապես սկսել աշխատանքը: Ինչպես նշվում է, խոսքը Գերմանիայի բացառիկ տնտեսական գոտում խողովակների տեղադրման աշխատանքների մասին է։ Այս հատվածի ընդհանուր երկարությունը մոտ 30 կմ է:
Նոր թույլտվությունն անհրաժեշտ է եղել մասնավորապես այն պատճառով, որ 2019 թվականի դեկտեմբերին ԱՄՆ-ի հնարավոր պատժամիջոցների պատճառով՝ շվեյցարական Allseas ընկերությունը հրաժարվել էր խողովակներ անցկացնելուց: Իսկ այդ ընկերության նավերի համար շինարարության թույլտվությունն արդեն տրվել էր ձմռան ամիսներին, բայց շվեյցարական ընկերության հեռանալուց հետո Nord Stream 2 AG- ն ստիպված էր անցնել այլ տեսակի նավերի , որոնք հագեցած են խարիսխի տեղակայման համակարգով, ինչպիսին է օրինակ Fortuna-ն: Հետևաբար, պահանջվում էր նոր թույլտվություն:
Հիշեցնենք, որ «Հյուսիսային հոսք-2» գազատարը անցնելու է Բալթիկ ծովի Ռուսաստանի ափերով դեպի Գերմանիա: ԱՄՆ-ը, որը ցանկանում է ԵՄ ներմուծել իր գազը, ակտիվորեն դեմ է գազատարի շինարարության ավարտին՝ պնդելով, որ նախագիծը ենթադրաբար սպառնում է Եվրոպայի էներգետիկ անվտանգությանը:
Տաթև Ֆռանգյան
