18.11.2024 | 23:30
Ռուսաստանի հավաքականը հնարավոր է չմասնակցի առաջիկա ԱԱ-ին
Չավուշօղլուն խոսել է ԼՂ-ից, Մինսկի խմբի գործընթացից և նորից սպառնացել Երևանին՝ «գլխին նոր արկածներ չբերել»
Քաղաքականություն
14.01.2021 | 19:11
Թուրքիայում կրկին խոսել են Ադրբեջանի աջակցելու մասին՝ վերականգնելու «օկուպացիայից ազատագրված» հողերը։ Թուրքիայի ԱԳ նախարար Մևլութ Չավուշօղլուն Küresel Medya-ին տված հարցազրույցում ասել է, որ Անկարան կմասնակցի նաև Լեռնային Ղարաբաղում հրադադարի ռեժիմի դիտարկմանը, գրում է «Անադոլու» գործակալությունը։
«Չնայած հայկական կողմի ագրեսիվ գործողություններին՝ Ադրբեջանին հաջողվեց վերադարձնել տարածքների մեծ մասի նկատմամբ վերահսկողությունը։ 44-օրյա պատերազմի արդյունքում ստորագրվեց եռակողմ հայտարարություն, Բաքուն վերադարձրեց ԼՂ-ի հարակից 7 շրջանները»,- ասել է Չավուշօղլուն։
Նա նաև անդրադարձել է Մինսկի խմբի հետագա գործունեությանը՝ նշելով, որ նոյեմբերի 9-ի հայտարարությունը մեծապես արտացոլում է այն գաղափարն ու սկզբունքները, որոնք առաջ են քաշվել հենց Մինսկի խմբի գործընթացի շրջանակում։
«ԵԱՀԿ Մինսկի խումբը կարող է, անհրաժեշտության դեպքում, նորից իր դերակատարումն ունենալ։ Դրա համար համանախագահներն առաջին հերթին պետք է կառուցողական ու կոնկրետ մոտեցումներ որդեգրեն, դասեր քաղեն միջնորդության վատ մակարդակից, որն ավելի վաղ ցուցադրվել էր»,- հայտարարել է Չավուշօղլուն։
Կրկին խոսելով տարածաշրջանում երկարատև խաղաղության մասին՝ թուրք նախարարը սպառնացել է Հայաստանին։
«Թուրքիան Ռուսաստանի հետ միասին ստեղծել է մոնիթորինգային կենտրոն, որը նախատեսված է Լեռնային Ղարաբաղում հրադադարի ռեժիմի խախտումները դիտարկելու համար։ Հրադադարը շատ կարևոր բաղկացուցիչ է, այն պիտի պահպանվի։ Մենք հայկական կողմից ակնկալում ենք պայմանավորվածությունների պահպանում։ Երևանը չպետք է իր գլխին նոր արկածներ փնտրի և աջակցի երկարատև քաղաքական կարգավորման ջանքերին՝ Բաքվի ինքնիշխանության ճանաչմամբ Ադրբեջանի՝ երբևէ «օկուպացված տարածքների» նկատմամբ»,- ասել է նա՝ հավելելով, որ եթե եռակողմ հայտարարությունը կյանքի կոչվի և Հայաստանի ու Ադրբեջանի երկխոսությունը բարելավվի, այն միանշանակ դրական ազդեցություն կունենա Անկարայի ու Երևանի հարաբերությունների վրա։
Էմմա Չոբանյան
