17.09.2026 | 09:36
«Համապարփակ անվտանգություն և դիմակայունություն 2026» միջազգային համաժողովը. ՈՒՂԻՂ
Ադրբեջանում առաջարկում են Կարս-Գյումրի-Նախիջևան-Մեղրի-Բաքու ուղղությամբ երկաթուղու կառուցում․ արդեն ծախսերի հաշվարկ են արել՝ 434 մլն դոլար
Քաղաքականություն
13.01.2021 | 19:47
Հայաստանի տարածքով Ադրբեջանն ու Թուրքիան իրար կապող նոր երկաթուղու կառուցումը Բաքվում գնահատում են 434 մլն դոլար։ Այս մասին հայտարարել է ադրբեջանական Տնտեսական բարեփոխումների ու հաղորդակցության վելուծական կենտրոնի տնօրեն Վասուլ Հասիմլին։ Նա կարծիք է հայտնել, որ Ադրբեջանի համար Կարս-Նախիջևան-Մեղրի-Զանգելան-Բաքու երկաթուղին կարևոր նշանակություն ունի Նախիջևանը շրջափակումից հանելու տեսանկյունից, կնպաստի տրանսպորտային ծախսերի նվազեցմանը, կավելացնի արտաքին առևտուրը, զբոսաշրջությունն ու ուղևորափոխադրումը։
Հասիմլին նշել է, որ Հայաստանը կարող է Ռուսաստանի հետ տրանսպորտային կապեր հաստատել երկու ուղղություններով՝ Գյումրի-Նախիջևան-Մեղրի-Բաքու և Իջևան-Ղազախ-Բաքու։ Նա նաև երկաթուղու կառուցման հաշվարկներ է մոտավոր ներկայացրել։
«Հաշվի առնելով, որ Կարս-Գյումրի երկաթուղային գիծը կարող է կառուցվել, արտասահմանյան աղբյուրների տվյալներով՝ Կարս-Գյումրի-Նախիջևան-Մեղրի-Բաքու երկաթուղու կառուցումը կկազմի մոտավորապես 434 մլն դոլար»,- ասել է Վասուլ Հասիմլին։
Նշենք, որ նոյեմբերի 9-ին Հայաստանի, Ռուսաստանի ու Ադրբեջանի ղեկավարների կողմից ստորագրած հայտարարության 9-րդ կետում, ինչպես նաև հունվարի 11-ի եռակողմ հայտարարության մեջ նշված չէ, թե երկաթուղային ու ճանապարհային հաղորդակցությունը ո՞ր ուղղություններով և ինչպե՞ս է իրականացվելու, որևէ հիշատակում չկա, որ երկաթուղին անպայման անցնելու է Մեղրիով։ Առավել ևս ոչինչ չկա Ադրբեջանը Հայաստանի տարածքով Թուրքիային կապող կամ Հայաստանը Թուրքիային կապող երկաթուղու մասին։
Նոյեմբերի 9-ի հայտարարությամբ ՀՀ-ն երաշխավորելու է միայն տրանսպորտային կապերի անվտանգությունը Ադրբեջանի արևմտյան շրջանների և Նախիջևանի Ինքնավար Հանրապետության միջև՝ երկու ուղղություններով քաղաքացիների, տրանսպորտային միջոցների և ապրանքների անխոչընդոտ տեղաշարժը կազմակերպելու համար:
Ի դեպ, Ադրբեջանում կան նաև քննարկումներ, որ Մեղրիով ճանապարհի բացումը հայկական կողմի համար անընդունելի է և Հայաստանը կառաջարկի Իջևանի ուղղությունը։ Մասնավորապես, «Սպուտնիկ Ադրբեջանի» հետ զրույցում պատգամավոր Ռասիմ Մուսաբեկովն ասել է, թե խորհրդային տարիներին եղել է Ղազախ-Իջևան երկաթուղին, որն անցել է Հայաստանի ամբողջ տարածքով՝ դեպի Նախիջևան, Իրան ու Թուրքիա։ Նա նշել է, որ Հայաստանը հենց այս ուղղությունն է ուզում վերականգնել։
«Դա նրանց ձեռնտու է, քանի որ այս դեպքում երկաթուղու մեծ մասը կանցնի Հայաստանով։ Դրանով նրանք կարող են լավ փող աշխատել։ Ավելին, նրանք ավելի շատ վերահսկողություն կունենան ճանապարհի վրա։ Հենց այնպես չէ, որ այս տարիներին նրանք ապամոնտաժել են Մեղրիի ճանապարհը։ Չեն ուզում, որ այն ընդհանրապես լինի»,- ասել է Մուսաբեկովը։
Նա նաև նշել է, թե Մեղրիով ավտոճանապարհ խորհրդային ժամանակներում էլ չի օգտագործվել և նույնիսկ կառուցումը չի ավարտվել։ Պատգամավորը նաև հավելել է, որ ադրբեջանական կողմը պնդելու է Մեղրիի տարբերակի հարցում։
Էմմա Չոբանյան
