Քարտեզի նոր ձևավորում է գնում, և Հայաստանն այդտեղ տեղ չունի․ սուբյեկտայնությունը կորցնում ենք․ Արամ Սարգսյան

Թուրքիայի գլխավոր խնդիրը Սյունիքն է, որի միջոցով ուզում է թուրքալեզու պետությունները միավորել։ Սյունիքի տարածքով տրվող ավտոճանապարհը հետո դառնալու է ավելի լայն հասկացություն, որից հետո հայաթափում է իրականացվելու ամբողջ տարածքում։ Այս մասին այսօր լրագրողների հետ զրույցում ասաց Հայաստանի Դեմոկրատական կուսակցության նախագահ Արամ Սարգսյանը՝ ընդգծելով, որ Թուրքիան հետևողականորեն գնում է այս նպատակի իրագործմանը։

«Շատ ծանր վիճակում ենք հայտնվել։ Աշխարհաքաղաքական այնպիսի պրոցեսներ են գնում, որին այսօր մեր իշխանություններն ուղղակի չեն էլ տիրապետում։ Այս ամբողջը, ինչ գծվում է այսօր՝ տրանպորտային կոմունիկացիա և այլն, այդ քարտեզի նոր ձևավորումն է գնում, և Հայաստանն այդտեղ տեղ չունի։ Հայաստանն ընդամենը մի տարածք է դառնալու, որտեղ չգիտես՝ ինչքան ու ինչ կարգավիճակով է լինելու։ Սուբյեկտայնությունը կորցնում ենք, սուվերենությունը կորցնում ենք»,- նշեց Արամ Սարգսյանը։

Նա անդրադարձավ նաև ստորագրված հայտարարության տնտեսական հետևանքներին՝ ընդգծելով, որ Հայաստանը տնտեսապես մրցունակ չէ և փոքր ու միջին բիզնեսը մեծապես տուժելու է։

«Մեր ինքնարժեքը գյուղատնտեսական ապրանքների շատ ավելի բարձր է, քան Թուրքիայինը։ Մերը որակյալ է, նրանցը՝ անորակ, բայց նրանցը շուկա է գրավում, քանի որ գինը շատ ավելի ցածր է։ Երկրորդ՝ նրանք են գինը թելադրելու, որովհետև դու տարանցիկ երկիր չես դառնում, մտնում ես թուրքական պարկի մեջ։ Երբ Թուրքիային պետք լինի փակել այդ ճանապարհը, ինքն այնտեղից կփակի, Ադրբեջանին պետք լինի՝ այնտեղից կփակի։ Սա է ամենագլխավոր խնդիրը։ Դուք չեք ապաշրջափակվել»,- կարծիք հայտնեց Արամ Սարգսյանը։