«Քաղաքականությամբ չզբաղվող նախագահը շատ ավելի լավ մարիոնետկա է ծառայելու Սերժ Սարգսյանի ձեռքին». Լևոն Զուրաբյան

ՀԱԿ փոխնախագահ Լևոն Զուրաբյանը Factor.am-ի հետ զրույցում անդրադառնալով մարտի 2-ին սպասվող ՀՀ նոր նախագահի ընտրություններին, ասում է, որ «Սերժ Սարգսյանը ստեղծել է մի Սահմանադրություն, որով նախագահը լինելու է մարիոնետի նման, տիկնիկ, որը կառավարվելու է իր կողմից»:

«Ինչու, որովհետև ինքն ունի պառլամենտական հանրապետության շղարշի տակ թաքնված ավտորիտար ռեժիմ, որը կեղծում է ընտրությունները, ունի կեղծված մեծամասնություն այդ պառլամենտում, և այդ կեղծված մեծամասնությունը կարող է ընտրել նախագահ և դիկտատորի քմհաճույքով կարող է այդ նախագահին ուղարկել գրողի ծոցը»,- նշում է Զուրաբյանը:

ՀԱԿ փոխնախագահի խոսքով՝ գործառույթը, որը նախատեսվել է նախագահի համար նոր Սահմանադրությամբ, հանգիստ կարող է իրականացնել մի մարդ, որը ոչ լեզուների է տիրապետում, ոչ կապեր ունի: «Ուղղակի մի քիչ ավելի գեղեցիկ խաղալիք կլինի՝ ժողովրդին ներկայացնելու համար, բայց դա լինելու է խաղալիք, մարիոնետկա, տիկնիկ՝ Սերժ Սարգսյանի ձեռքում»,- շեշետում է ՀԱԿ ներկայացուցիչը:

Նշենք, որ օրերս մտավորականների հետ հանդիպման ժամանակ Սերժ Սարգսյանն ասել է, որ ապագա նախագահը պետք է տիրապետի օտար լեզուների, ունենա լայն կապեր թե՛ սփյուռքում, թե՛ Հայաստանում, վայելի հեղինակություն և որ ամենակարևորն է՝ անկողմնակալ մարդ լինի, ով երբեք քաղաքականությամբ չի զբաղվել և կուսակցության անդամ չի եղել:

«Քաղաքականությամբ չզբաղվող նախագահը շատ ավելի լավ մարիոնետկա է ծառայելու Սերժ Սարգսյանի ձեռքին»,-տեսակետ հայտնեց Լևոն Զուրաբյանը:

Հարցին, թե քաղաքականությամբ զբաղվածները «ավելի վա՞տ մարիոնետկա» կլինեին, ՀԱԿ փոխնախագահն այսպես արձագանքեց. «Կարող են ունենալ քաղաքական ամբիցիա, թեկուզ փոքրիկ, բայց քաղաքական հենարան, հետևորդներ, որոնք կարող են այդ մարիոնետկան ոչ այդքան կատարյալ դարձնել»:

Հարցին, թե իսկ ո՞ւր է «կորել» ՀԱԿ-ը, ինչո՞ւ խորհրդարանական ընտրություններից մինչ այժմ պասիվ դիրքերում է, և կարծում է, հանրությունն իրենց կների՞ այս ժամանակահատվածի իներտության համար, Լևոն Զուրաբյանը հակադարձեց. «Դա ճիշտ չէ: Մենք խոսել ենք գլխավոր պատճառների մասին, թե Հայաստանն ինչու է այս վիճակում և ընտրությունների գնացել ենք այդ մեսիջով: Մենք ի՞նչ է, պետք է հա հիշեցնե՞նք մեր մեսիջը: Մենք այդ առումով այս պահին նոր ասելիք չունենք: Չենք կարող ասել՝ հիմա իրավիճակը փոխվել է, նոր խնդիրներ են առաջացել: Ոչ»:

Խորհրդարանի ընտրություններից հետո, ըստ ՀԱԿ փոխնախագահի, կար մի ժամանակահատված, որ «ուղղակի իմաստ չուներ» զբաղվել ակտիվ քաղաքական գործունեությամբ. «Բայց ես վստահ եմ, որ աստիճանաբար վիճակը կփոխվի»,-ասաց Զուրաբյանը:

Նա նաև համոզված է, որ պասիվ քաղաքական գործունեության արդյունքում ՀԱԿ-ը չի դառնա մարգինալ ուժ:

Մանրամասները դիտեք Լևոն Զուրաբյանի հետ Factor.am-ի հարցազրույցը:

Մարինե Խառատյան