11.10.2026 | 20:00
15 հազար մարդ Հայաստան է գալիս․ ի՞նչ է սպասվում COP17-ում․ բնությունը մարդուց պաշտպանելու ՇԵՐՏԵՐԸ
52 ձերբակալված Վաշինգտոնում․ դեմոկրատների ու հանրապետականների գրասենյակից առգրավվել են ինքնաշեն պայթուցիկներ ու զենք. ՏԱՍՍ
Քաղաքականություն
07.01.2021 | 12:04
Վաշինգտոնում տեղի ունեցած անկարգությունների պատճառով պարետային ժամ է հայտարարվել։ Չորեքշաբթի երեկոյան իրավապահները ավելի քան 50 մարդու են բերման ենթարկել պարետային ժամից հետո: Այս մասին մամուլի ասուլիսի ժամանակ հայտարարել է մայրաքաղաքի ոստիկանության պետ Ռոբերտ Քոնտին, գրում է ՏԱՍՍ-ը:
«21: 30-ի դրությամբ մենք 52 ձերբակալում ենք իրականացրել: Մասնավորապես, չորս ձերբակալություն կապված է առանց լիցենզիայի զենք կրելու հետ, մեկ մարդ ձերբակալվել է արգելված զենք կրելու համար», – ասել է նա։
Վերջինս նաև տեղեկացրել է, որ 47 մարդ ձերբակալվել է պարետային ժամը խախտելու և Կապիտոլիումի շենք ապօրինի ներխուժելու համար։ Քոնտին հայտնել է, որ իրավապահները երկու ինքնաշեն ռումբ են հայտնաբերել, մեկը՝ Դեմոկրատական կուսակցության գրասենյակում, իսկ մյուսը ՝ Հանրապետական կուսակցությունում: Բացի այդ, նա նշել է, որ առգրավվել է վեց միավոր զենք: «Այս տվյալները նախնական են և կթարմացվեն», – նշել է ոստիկանապետը:
Հիշեցնենք՝ ԱՄՆ ներկայիս նախագահ Դոնալդ Թրամփի հազարավոր կողմնակիցների բազմությունը հունվարի 6-ին բողոքի ցույցեր էին կազմակերպել Կապիտոլիումի մոտ, այնուհետև նրանցից ոմանք ներխուժել են շենք, որտեղ կոնգրեսականները պատրաստվում էին ամփոփել նախագահական ընտրությունների արդյունքները, որոնցում հաղթել է դեմոկրատների թեկնածու Ջո Բայդենը:
Ինչպես նշում է CNN- ը, Կոնգրեսի շենքի վրա հարձակումը 1814 թ.-ին Անգլո-ամերիկյան պատերազմի ընթացքում բրիտանական հարձակումից հետո առաջին ներխուժումն էր:
Նկատենք, որ բազմաթիվ ամերիկացի քաղաքական գործիչներ տեղի ունեցածը որակում են որպես հեղաշրջման փորձ և կատարվածի մեջ մեղադրում են երկրի ներկայիս ղեկավարին:
Տաթև Ֆռանգյան
