28.04.2026 | 18:19
Մուստաֆաևն ու Գալուզինը Բաքվի և Մոսկվայի միջև հարաբերություններն են քննարկել
ԱՄՆ Կոնգրեսի շենքում կրակոցներ են հնչել․ վիրավոր կա
Քաղաքականություն
07.01.2021 | 00:53
ԱՄՆ Կոնգրեսի շենքում հնչած կրակոցների հետևանքով ցուցարարներից մեկը կրծքի շրջանում վիրավորում է ստացել։ Այս մասին գրում է ՌԻԱ Նովոստին՝ վկայակոչելով PBS հեռուստաալիքը։
«Կապիտոլիումի շենքում ինչ-որ մեկը վիրավորվել է։ Նա համազգեստով սպա չէ, այնպես որ՝ կարող ենք ենթադրել, որ ցուցարարներից մեկն է»,- ասել է News Hour-ի հաղորդավարը։
Գործող նախագահ Դոնալդ Թրամփի կողմնակիցների ցույցերի ֆոնին Սենատը դադարեցրել է նիստը։ Աշխատանքը դադարեցրել է նաև Ներկայացուցիչների պալատը, կոնգրեսականները տարհանվել են շենքից։
Նշենք, որ ԱՄՆ Կոնգրեսն ավելի վաղ նոյեմբերին տեղի ունեցած նախագահական ընտրությունների արդյունքների հաստատման գործընթաց է սկսել։ Ընտրությունների արդյունքները հաստատելու դեմ ելույթներ են հնչել, քննարկում է սկսվել։ Մի խումբ սենատորներ Արիզոնա նահանգից ընտրիչների ձայների հաստատման դեմ են հանդես եկել, ինչից հետո Կոնգրեսի ընդհանուր նիստը նախագահող ԱՄՆ փոխնախագահ Մայք Փենսը հայտարարել է, որ նիստը դադարեցվում է, Կոնգրեսի պալատները պետք է առանձին-առանձին քննարկեն առարկություններն ու քվեարկություն անցկացնեն։
Մինչ այդ, Կապիտոլիումի շենքի մոտ բախումներ են գրանցվել գործող նախագահ Դոնալդ Թրամփի կողմնակիցների և իրավապահների միջև։ Շենք ներխուժելու փորձ անող ցուցարարների դեմ ոստիկանությունն արցունքաբեր գազ և լուսաձայնային նռնակներ է կիրառել։ Վիրավորներ կան։
Միաժամանակ, նշվում է, որ Պենտագոնը մերժել է Վաշինգտոնի իշխանությունների՝ Կապիտոլիումի հարակից տարածքում Ազգային գվարդիայի ուժեր տեղակայելու պահանջը։ Կապիտոլիումի շուրջ տեղի ունեցած իրադարձությունների պատճառով Վաշինգտոնում պարետային ժամ է սահմանվել։
