08.10.2026 | 23:18
Քննարկվել են ՀՀ-ի և Իրանի մաքսային մարմինների միջև նախնական էլեկտրոնային տվյալների փոխանակման համակարգի գործարկման քայլեր
ԼՂ-ում ԱԹՍ-ներն օգտագործվել են որպես հարձակողական զենք․ Բունդեսվերը ԱԹՍ-ների օգտագործման մասին․ DW
Քաղաքականություն
03.01.2021 | 16:33
Գերմանիայի զինված ուժերի գլխավոր տեսուչ Էբերհարդ Ցորնը չի կիսում Գերմանիայի Սոցիալ-դեմոկրատական կուսակցության մտահոգությունները Բունդեսվերին մարտական անօդաչու թռչող սարքեր մատակարարելու հարցում: Այս մասին, ինչպես գրում է DW-ի ռուսական ծառայությունը, Ցորնն ասել է Welt am Sonntag թերթին տված հարցազրույցում:
«Մարտական անօդաչու թռչող սարքերի ռազմական պահանջարկը, ըստ իս, մնում է անփոփոխ: Եվ հատկապես արտասահմանյան առաքելությունների ընթացքում, որոնք մենք այսօր իրականացնում ենք», – ասել է Ցորնը: Նման սարքավորումներն անհրաժեշտ են օդից զինվորների պաշտպանությունը և դիրքերում նրանց գործառնական ներուժը բարելավելու համար, շեշտել է նա:
2020 թվականի դեկտեմբերին Գերմանիայում իշխող կոալիցիայի պահպանողական գործընկեր Սոցիալ-դեմոկրատական կուսակցությունը հրաժարվել է հաստատել ԱԹՍ-ներ գնելու նոր նախագիծը: Իրադարձությունները, որոնք սոցիալ-դեմոկրատներին ստիպեցին նման որոշում կայացնել, Լեռնային Ղարաբաղի հակամարտությունն էր և «անօդաչուների պատերազմը», որը մղում էին Հայաստանը և Ադրբեջանը, ասում է Սոցիալ-դեմոկրատների խորհրդարանական խմբակցության փոխնախագահ Գաբրիելա Հայնրիխը:
«Պատմության մեջ առաջին անգամ զինված հակամարտության ելքը որոշվեց բացառապես անօդաչու թռչող սարքերի օգտագործմամբ», – ասել է նա:
Էբերհարդ Ցորնը համոզված է, որ ղարաբաղյան հակամարտությունը չպետք է կասկածի տակ դնի Բունդեսվերի համար անօդաչու թռչող սարքերի գնումը:
«Լեռնային Ղարաբաղում մարտական անօդաչու թռչող սարքերն օգտագործվում էին որպես հարձակողական զենք: Բունդեսվերի կողմից մարտական անօդաչու թռչող սարքերի օգտագործումը կկարգավորվի հստակ կանոններով, որոնք մեր խորհրդարանը նախկինում հաստատել և սահմանել է համապատասխան մանդատով», – ընդգծել է գլխավոր տեսուչը: Նա հավելել է, որ գերմանական բանակը չի օգտագործի անօդաչու թռչող սարքեր այնպես, ինչպես դա արեցին ղարաբաղյան հակամարտության ժամանակ:
Վերջերս Գերմանիայի Պաշտպանության նախարարությունը՝ Սոցիալ-դեմոկրատների խնդրանքով, բազմիցս նախաձեռնել է քննարկումներ անօդաչու թռչող սարքերով զինման խնդրի շուրջ: Քննարկումներին մասնակցել են զինվորականներ, իրավապաշտպաններ, քաղաքական գործիչներ և պաշտպանության ոլորտի փորձագետներ: Այս կապակցությամբ, Գերմանիայի պաշտպանության նախարար Աննեգրեթ Կամփ-Կարենբաուերը ակնհայտ զայրույթով է արձագանքել Սոցիալ-դեմոկրատների դեկտեմբերյան դեմարշին:
Տաթև Ֆռանգյան
