10.08.2026 | 21:05
Սելավ Վայոց ձորում. ավտոճանապարհը լցվել է ջրաբերուկներով
ՀՀ ԿԳՆ-ում քննարկվել են ՌԴ բարձրագույն ուսհաստատություններում կրթություն ստանալու հնարավորությունները
Հասարակություն
17.01.2018 | 16:56
ՀՀ կրթության և գիտության նախարար Լևոն Մկրտչյանն ընդունել է Երևանում Ռուսաստանի գիտության և մշակույթի կենտրոնի (Ռոսսոտրուդնիչեստվո) տնօրեն Սերգեյ Ռիբինսկուն: Հանդիպման ընթացքում քննարկվել են Ռոսսոտրուդնիչեստվոյի հետ համագործակցության այս տարվա օրակարգային մի շարք հարցեր: Մասնավորապես անդրադարձ է եղել միջպետական ծրագրերով Ռուսաստանի բարձրագույն ուսումնական հաստատություններում կրթություն ստանալու հնարավորություններին և խնդիրներին: Այս համատեքստում նախարար Լևոն Մկրտչյանը նշել է, որ 2018 թվականի հունվարից գործողության մեջ մտած «Զինվորական ծառայության և զինծառայողի կարգավիճակի մասին» ՀՀ օրենքի պահանջները իրավական նոր կարգավորումների անհրաժեշտություն են առաջացնում միջպետական ծրագրերով օտարերկրյա բուհերում սովորելու ցանկություն ունեցող ՀՀ զինապարտ քաղաքացիների համար:
Իր հերթին շնորհակալություն հայտնելով արդյունավետ համագործակցության համար՝ Սերգեյ Ռիբինսկին հույս է հայտնել, որ կրթության և մշակույթի բնագավառներում նախորդ տարվա արձանագրված գործնական ու հստակ ծրագրերով հագեցած համագործակցությունն իր շարունակությունը կունենա այս և հետագա տարիներին:
Հանդիպման ընթացքում քննարկվել են միջբուհական գործակցությանը, ուսուցիչների վերապատրաստման դասընթացներին և հայ-ռուսական համագործակցությանն առնչվող մի շարք աշխատանքային հարցեր:
