Չեն կարող ընդդիմությունը և Սերժ Սարգսյանը խոսել նույն խնդրի մասին՝ ենթադրելով քաղաքական լուծումներ. Զարուհի Փոստանջյան

Ի՞նչ պետք է անենք մենք՝ որպես «Երկիր Ծիրանի» քաղաքական ուժի անդամներ այս տարի, իհարկե պետք է պայքար մղենք, իսկ պայքարի տրամաբանությունը այն պետք է լինի, որ կարողանանք տապալել ապօրինի գործող այս իշխանությունը, բռնակալությունը և, իրոք, հիմնադրենք հանրապետություն, որը պատկանում է յուրաքանչյուր հայ մարդու և հայրենիք, որը պատկանում է յուրաքանչյուր հայի. այսօր հրավիրված ասուլիսին ասաց «Երկիր Ծիրանի» կուսակցության առաջնորդ Զարուհի Փոստանջյանը:

«Թանկացումները հետևանք են այս քաղաքական համակարգի և որևէ մեկը չի կարողանալու զսպել թանկացումը, եթե չփոխենք քաղաքական կառուցվածքը մեր երկրի»,- ասաց Փոստանջյանը՝ հիշեցնելով թանակցումներին նախորդող իրադարձությունները:

«Դա, իհարկե պետական պարտքի մասին օրենքի մեջ փոփոխությունն էր դեռ անցյալ տարի, դա մեր աճող պետական պարտքն է, որը պահանջում է հարկային բեռի ավելացում, իսկ վերջինս հանգեցնում է նրան, որ գնաճ տեղի ունենա»,- ասաց նա:

Անդրադառնալով թանկացումների դեմ «Ելքի» բողոքի երթին, Զարուհի Փոստանջյանն ասաց, որ չի միանա, քանի որ քաղաքական օրակարգ չի տեսնում ու  հասկանում է, որ Սերժ Սարգսյանն ու «Ելք»-ը նույն խնդրով են մտահոգված։

«Միամիտ չենք, գիտենք՝ ինչ է տեղի ունենում, եթե այս խնդրի մասին խոսում է Սերժ Սարգսյանը, որը այս քաղաքական համակարգի հիմնասյուներից է, ապա քաղաքական օրակարգ չէ։ Չեն կարող ընդդիմությունը և Սերժ Սարգսյանը խոսել նույն խնդրի մասին՝ ենթադրելով քաղաքական լուծումներ»,- ասաց նա:

Մանրամասները տեսանյութում: