17.09.2026 | 15:10
Փաշինյանը՝ ռուսական ռազմաբազայի դուրսբերման մասին // Գերմանիան ՀՀ ՊՆ-ին ձնագնացներ է նվիրել․ ԼՈՒՐԵՐ
Լոնդոնն ու Բրյուսելը համաձայնության են հասել Brexit-ից հետո իրենց հարաբերությունների շուրջ
Քաղաքականություն
25.12.2020 | 15:03
Մեծ Բրիտանիան և Եվրամիությունը դեկտեմբերի 24-ին ավարտել են Brexit-ից հետո իրենց հարաբերությունների շուրջ համաձայնագրի տեքստի համաձայնեցումը: Ակնկալվում է, որ ԵՄ դեսպանները Մեծ Բրիտանիայի հետ կնքված Brexit-ի առևտրային գործարքի վերաբերյալ հանդես կգան ճեպազրույցով:
ԵՄ-ից գլխավոր բանակցող Միշել Բարնիեն պետք է դիվանագետներին տեղեկացնի պայմանագրի վերաբերյալ, որը ձեռք է բերվել ձկնորսությամբ զբաղվելու իրավունքների և բիզնեսի կանոնների շուրջ ամիսներ շարունակ տևած բանակցություններից հետո, գրում է BBC-ն:
Եվրախորհրդարանը պետք է դեռևս վավերացնի գործարքը, բայց հազիվ թե դա արվի մինչև Ամանոր, ինչը նշանակում է, որ մինչ այդ դրա կիրառումը պաշտոնապես ժամանակավոր կլինի:
Երկրի կառավարության կայքում հրապարակվել է գործարքի 34 էջանոց ամփոփագիրը: Մեծ Բրիտանիայի առևտրի հարցերով գլխավոր բանակցող Լորդ Ֆրոսթը հայտնել է, որ շուտով կհրապարակվի ամբողջական փաստաթուղթը, որը բաղկացած է շուրջ 1500 էջից՝ ներառյալ շուրջ 1000 էջից բաղկացած հավելվածներն ու ծանոթագրությունները:
Հինգշաբթի երեկոյան Twitter-ում տեղադրված Սուրբ Ծննդյան տեսաուղերձում Մեծ Բրիտանիայի վարչապետ Բորիս Ջոնսոնը ցույց է տվել փաստաթղթի օրինակը:
Ջոնսոնը նշել է, որ համաձայնության շուրջ ԵՄ-ի հետ բանակցություններն անցել են լավ և Մեծ Բրիտանիային կայունություն են նվիրել: «Ես հավատում եմ, որ դա լավ գործարք է նաև ամբողջ Եվրամիության համար»,- ասել է վարչապետը:
Տաթև Ֆռանգյան
