08.06.2026 | 06:48
1299 ընտրատեղամասերում քվեարկության նախնական արդյունքները․ ԿԸՀ
Անհետ կորած զինծառայողների ընտանիքները կարող են հատուցում ստանալ 6 ամսվա փոխարեն 3 ամիս անց․ Կառավարության առաջարկը. ՏԵՍԱՆՅՈՒԹ
Հասարակություն
24.12.2020 | 11:26
Այսօրվա նիստում Կառավարությունը Քաղաքացիական օրենսգրքում և Հայաստանի Հանրապետության պաշտպանության ժամանակ զինծառայողի կյանքին ու առողջությանը պատճառված վնասի հատուցման մասին օրենքում փոփոխություններ կատարելու փաթեթը ներկայացրեց արդարադատության նախարար Ռուստամ Բադասյանը:
«Այս փոփոխությունները հնարավորություն կտան մարտական գործողություններին մասնակցած մեր հայրենակիցներին հատուցում ստանալ հիմնադրամից: Մասնավորապես, կարգավորել ենք հետևյալը. հիմա անհայտ բացակայող ճանաչելու համար անհրաժեշտ է, որ մեկ տարի անձի գտնվելու վայրի մասին տեղեկություններ չլինեն: Մենք բացառություն կամ հատուկ կարգավորում ենք սահմանում զինծառայողների համար ռազմական գործողություններով պայմանավորված և այդ ժամկետը կրճատում ենք դարձնելով երեք ամիս: Այն հետադարձ ուժով տարածվելու է սեպտեմբերի 27-ից հետո ծագած հարաբերությունների վրա: Սա նշանակում է, որ ընտանիքի անդամները կարող են դիմել դատարան՝ անձին անհայտ բացակայող ճանաչելու համար և դատական ակտը օրինական ուժի մեջ մտնելուց հետո դիմել հիմնադրամ, անհայտ բացակայող ճանաչելու փաստի հիման վրա հատուցում ստանալու նպատակով»:
Բադասյանի խոսքով՝ դատական ակտից հետո պետք է 6 ամիս անցներ, որ հատուցումը տրամադրվեր, այդ ժամկետը կրճատվում է: «Այսինքն, եթե հաշվարկում ենք սեպտեմբերի 27-ից, ապա դատական ակտի ուժի մեջ մտնելու պահին այդ երեք ամիսն արդեն անցած կլինի, մեր հայրենակիցները հնարավորություն կունենա հատուցում ստանալու հիմնադրամից»:
Նշենք, որ Խոսքը 82 մլն կամ 70 մլն դրամ հատուցման մասին է՝ կախված անձի կարգավիճակից: Դրանից 10 մլն դրամը տրվում է միանվագ, մնացածը 20 տարվա մեջ ամսական կտրվածքով։
Կառավարության մյուս փոփոխությունը վերաբերում է կամավորականներին, որոնք զորահավաքի գործընթացով չեն անցել. «Մենք այնպես ենք կարգավորում, որ ՊՆ-ի տված տեղեկանքի հիման վրա կամավորականները ևս հնարավորություն ունենան ՊՆ-ի տեղեկանքի հիման վրա դիմել հիմնադրամ ու կրկին հատուցում ստանալ»,-նշեց Բադասյանը։
