21.12.2025 | 22:02
Ֆուտզալի Հայաստանի հավաքականը հաղթեց Մոլդովային
Կորոնավիրուսի նոր շտամի տարածումը դեռևս վերահսկողությունից դուրս չի եկել․ ԱՀԿ
Քաղաքականություն
22.12.2020 | 14:30
Չնայած այն հանգամանքին, որ կորոնավիրուսի նոր ու ակնհայտորեն ավելի վարակիչ շտամն ամբողջ աշխարհի երկրների ղեկավարների լուրջ մտահոգությունն է առաջացնում, Առողջապահության համաշխարհային կազմակերպությունը (ԱՀԿ) կոչ է անում խուճապի չմատնվել, գրում է DW-ի ռուսական ծառայությունը։
«Նույնիսկ եթե վիրուսը մի փոքր ավելի արագ է տարածվում, այն դեռ կարելի է կանգնեցնել»,- ընդգծել է ԱՀԿ արտակարգ իրավիճակների համակարգող Մայքլ Ռայանը:
Նրա խոսքով՝ իրավիճակը «դեռևս վերահսկողությունից դուրս չի եկել»:
«Ոչ մի ապացույց չկա, որ նոր շտամը կհանգեցնի հիվանդության ավելի ծանր ընթացքի»,- հայտարարել է Ռայանը՝ տեղեկացնելով, որ դրա դիմակայունությունը մշակման փուլում գտնվող պատվաստանյութերի հանդեպ այժմ փորձարկվում է մի քանի լաբորատորիաներում: Ըստ ԱՀԿ-ի՝ նոր շտամը վերահսկելու ռազմավարությունը մնում է նույնը և որևէ փոփոխություն չի պահանջում:
Մինչ այդ, կորոնավիրուսի նոր՝ մուտացված շտամը, բացի Մեծ Բրիտանիայից, արդեն հայտնաբերվել է Ավստրալիայում, Իսլանդիայում, Իտալիայում, Նիդերլանդներում և Դանիայում: Այս բոլոր երկրներում՝ բացառությամբ Դանիայի, խոսքը միայն առանձին դեպքերի մասին է:
Տաթև Ֆռանգյան
