11.10.2026 | 23:33
Հակոբ Շարբաթյանը՝ բռնցքամարտի Եվրոպայի Մ-17 չեմպիոն. ՏԵՍԱՆՅՈՒԹ
ԼՂ-ի ռազմական գործողություններին Մերձավոր Արևելքից վարձկանների մասնակցությունն արձանագրված փաստ է․ ՌԴ ԱԳ փոխնախարար
Քաղաքականություն
21.12.2020 | 18:30
Ռուսաստանի ԱԳ նախարարի տեղակալ Օլեգ Սիրոմոլոտովը ՌԻԱ Նովոստիի հետ զրույցում անդրադարձել է մի շարք հարցերի, այդ թվում՝ ԼՂ-ի հակամարտության գոտում վարձկանների առկայությանը։
Հարցին՝ արդյո՞ք Ռուսաստանը տվյալներ ունի ԼՂ-ում կռված վարձկանների հետ կապված, նրանք տարածաշրջանից դուրս բերվե՞լ են, ու՞մ կողմից և ու՞ր, Սիրոմոլոտովն արձագանքել է, որ վարձկանների առկայությունը հաստատված փաստ է։
«Լեռնային Ղարաբաղում ռազմական գործողություններին Մերձավոր Արևելքից վարձկանների մասնակցությունն արձանագրված փաստ է, որը հաստատվել ոչ միայն մեր կողմից։ Վարձկանների թիվը հաշվվում է մոտ 2000։ Մենք հենց սկզբից մտահոգություն ենք հայտնել այնտեղ ծայրահեղական վարձկանների հայտնվելու կապակցությամբ, որոնք դավանում են ջիհադիզմի գաղափարախոսությունը։ Մեր դիրքորոշումը նրանց նկատմամբ փոփոխության չի ենթարկվել՝ նրանք այնտեղ չպիտի լինեն»,- ասել է Օլեգ Սիրոմոլոտովը։
Պաշտոնյան, սակայն, չի նշել՝ վարձկանները դուրս բերվե՞լ են տարածաշրջանից կամ այդ ուղղությամբ ի՞նչ քայլեր են ձեռնարկվում։ Բացի այդ, հստակ չի ասել, թե ո՞ր կողմն է սիրիացի վարձկաններին բերել՝ ռազմական գործողություններին մասնակցելու։
Նշենք, որ Արցախում պատերազմական գործողությունների դեռ մեկնարկին հայկական կողմը բազմիցս հանդես է եկել հայտարարություններով ու ապացույցներով, որ Ադրբեջանի ԶՈՒ-ի հետ միասին սիրիացի վարձկաններ են կռվում։ Երկու սիրիացի վարձկաններ էլ Հայաստանում կալանավորված են։ Սիրիայի քաղաքացիներ, ազգությամբ արաբ Յուսեֆ Ալաբեթ Ալ Հաջին և Մուհհռաբ Մուհամմադ Ալ Շխերին մեղադրվում են Հայաստանի քրեական օրենսգրքի մի շարք հոդվածներով՝ վարձկանություն, միջազգային ահաբեկչություն, միջազգային մարդասիրական իրավունքի նորմերի լուրջ խախտումները զինված ընդհարումների ժամանակ։
Ավելի վաղ էլ, մարտական գործողությունների ավարտից հետո, ՌԴ ԱԳՆ պաշտոնական ներկայացուցիչ Մարիա Զախարովան հայտարարել էր, թե Լեռնային Ղարաբաղի հակամարտության գոտի տեղափոխված սիրիացի վարձկանները «չեն անհետացել, չեն գոլորշիացել»։
«Մենք ելնում ենք նրանից, որ այս հարցը կլուծվի, և բոլոր կողմերը, որոնք շահագրգռված են այս տարածաշրջանում խաղաղությամբ, պետք է ջանքեր գործադրեն՝ այն լուծելու համար»,- ասել էր Զախարովան։
Էմմա Չոբանյան
