Խոշոր խաղացողներն ի վիճակի են շատ արագ դեստաբիլիզացնել ֆինանսական շուկան, փլուզել դրամը. պետք է զսպել այսպիսի գրոհները․ Ատոմ Մարգարյան. ՏԵՍԱՆՅՈՒԹ

Խոշոր խաղացողներն ի վիճակի են շատ արագ դեստաբիլիզացնել Հայաստանի ֆինանսական շուկան, պարզապես փլուզել դրամը, եթե համարժեք գործողություններ չլինեն»: Այս մասին «Դրամի արժեզրկումը և տնտեսական դաշտի խնդիրները» թեմայով քննարկմանն ասաց ՀՊՏՀ ինովացիոն և ինստիտուցիոնալ հետազոտությունների կենտրոնի ղեկավար, տնտեսագետ Ատոմ Մարգարյանը:

Նրա խոսքով՝ եկել է ժամանակը, որպեսզի աճուրդային մեխանիզմներ կիրառվեն,  զսպելու այսպիսի գրոհները: «Սա սուբյեկտիվ կողմն է: Օբյեկտիվորեն, արտաքին ազդակներն են մեծ դեր  խաղացել դրամի արժեզրկման հարցում, իհարկե, ծախսերը, ռեզերվների վրա ճնշումները: Կենտրոնական բանկը չի կարող այս իրավիճակում մի կողմ քաշված մնալ, չնայած երբեմն նման մեղադրանքներ հնչում են»,- ասաց տնտեսագետը:

Մարգարյանի դիտարկմամբ՝ պետական պարտքի կառուցվածքի դեֆորմացում է տեղի ունենում այն իմաստով, որ ներքին պարտքն անհամեմատ ավելի թանկ, անհամեմատ ավելի ռիսկային, բավականաչափ խնդրահարույց, վերջին տարիներին ստանում է  բավական մեծ, անընդունելի մեծ ծավալներ, և սա ճնշում է տնտեսության իրական հատվածի վրա»:

Տնտեսագետի կարծիքով՝ տնտեսական մոդելի, տնտեսական քաղաքականության գաղափարախոսության, կոնցեպտուալ նոր մոտեցումների խնդիր կա, պետք է առաջին հերթին քննարկվի փորձագիտական, ակադեմիական շրջանակներում, ազդակները փոխանցել քաղաքական շրջանակներին, տնտեսական քաղաքականության որոշումներ կայացնողներին:

«Գաղտնի չէ, որ այսօր իշխանության ձգտում են խոշոր  կապիտալի տերերը: Բաց ու պարզ ասեմ՝ հնարավոր է, այո, շուկաները դեստաբիլիզացնելու ռիսկեր նաև այդ հատվածից և, կարծում եմ, թե կառավարությունը, թե Կենտրոնական բանկն ուղղակի պետք է ուշադիր լինեն այս հարցում, թույլ չտան այդպիս ազդեցություններ, միջամտություններ»,- նշեց տնտեսագետը:

Մանրամասները՝ տեսանյութում: