«Նայած՝ թեկնածուն ով ա». Ծառուկյանը կպաշտպանի՞ Հանրապետականի նախագահի թեկնածուին

«Դուք ո՞նց եք մտածում, եթե էսօր Ծառուկյանը հայտարարում է, իր ընտրողները դուրս են գալիս փողոց, հարցի լուծումը ո՞րն է, մենք պետք է աղմուկ բարձրացնե՞նք, թե՞ հարցը կարգավորենք»,- Ազգային ժողովում ի պատասխան Factor.am-ի հարցին՝ հնարավո՞ր է «Ծառուկյան» դաշինքն աջակցի թանկացումների դեմ «Ելք»-ի նախաձեռնած հունվարի 19-ի երթին, հայտարարեց ԱԺ «Ծառուկյան» խմբակցության ղեկավար Գագիկ Ծառուկյանը:

Գործարար պատգամավորը փողոց դուրս գալու փոխարեն խոսեց նախագահ Սերժ Սարգսյանի հայտարարության մասին՝ նկատելով, որ նրա կողմից կա թանկացումների հարցը կարգավորելու հանձնարարական:

«Քանի որ երկրի նախագահը հանձնարարել է՝ քննարկել այդ հարցը, ամեն մի խմբակցություն իր մոտեցումը կասի, տեսնենք՝ ինչ են որոշում, քանի որ երկրի նախագահն այդ մասին հայտարարել է, որ Ազգային ժողովում այդ հարցը քննարկվի»,- շարունակեց Ծառուկյանը:

Մեր հաջորդ հարցին՝ ինչո՞ւ չաջակցեցին «Ելք»-ին՝ նախագահի թեկնածու առաջադրելու հարցում, Գագիկ Ծառուկյանը պատասպանեց. «Եթե մենք և «Ելք»-ը իրար հետ վերցված չի կազմում այն ցուցանիշը, որ կարողանանք մենք հաղթել, ինչի՞ համար մասնակցենք»:

Իրեն ընդդիմադիր հռչակած խմբակցության ղեկավարը չբացառեց՝ հնարավոր է աջակցեն Հանրապետականի ներկայացրած նախագահի թեկնածուին: «Նայած՝ թեկնածուն ով ա, եթե այսօր մեր ժողովուրդը լիարժեք իրավունք է տվել հանրապետականին՝ ընտրելու առանց մեզ և առանց «Ելք»-ի, ինչի՞ մասին է խոսքը»,- հավելեց Գագիկ Ծառուկյանը:

Շողիկ Գալստյան