18.12.2025 | 20:43
Հրդեհ Հայկաձոր գյուղում. այրվել է մոտ 1800 հակ անասնակեր
Արցախում որոնողական աշխատանքների արդյունքում հայտնաբերվել է 892 զոհված զինծառայողի մարմին․ ԱՀ ԱԻՊԾ
Քաղաքականություն
16.12.2020 | 16:08
Արցախի Արտակարգ իրավիճակների պետական ծառայությունը դեկտեմբերի որոնողական աշխատանքների արդյունքում 892 զինծառայողի մարմին է հայտնաբերել։ Այս մասին Factor.am-ի հետ զրույցում տեղեկացրին Արցախի ԱԻՊ ծառայությունից։
«Երեկ 64 մարմին են հանել Ջեբրայիլի ու Հորադիզի ուղղություններից։ Այսօր էլ նույն ուղղություններում 4 ջոկատ աշխատում է, թիվը երեկոյան կփոխվի։ Բոլոր ուղղություններով գնացել ենք։ Սկսել ենք նոյեմբերի 13-ին՝ Շուշիից, հետո շարունակել Մարտունիում, Մարտակերտում, Մարտունու այն բնակավայրերում, որտեղ ռազմական գործողություններ են տեղի ունեցել, հետո Հադրութ քաղաքում և հարակից գյուղերում, այնուհետև տեղափոխվել Ջեբրայիլ։ Այդ ընթացքում 2 անգամ Քաշաթաղի շրջանում, Իշխանաձորի, Կուբաթլուի հատվածներում ենք որոնողական աշխատանքներ իրականացրել»,- նշեց ԱԻՊԾ լրատվության բաժնի պետ Հունան Թադևոսյանը։
Նրա խոսքով՝ թեև արդեն հասցրել են բոլոր տարածքներում լինել, այնուամենայնիվ, կրկին նույն տարածքներում ստուգումների կարիք կա։
«Բոլոր ուղղություններում եղել ենք, բայց, ծնողների տեղեկությունների հիման վրա, դեռ մի քանի անգամ էլ պետք է շարունակենք բոլոր վայրերում։ Եղել են այդպիսի դեպքեր, Շուշիում արդեն ահագին մտել, դուրս ենք եկել։ Առաջին 3 օրերին հիմնականում դիակները հանել ենք, բայց դրանից հետո էլի 1-2 մարմին գտել ենք»,- նշեց Թադևոսյանը։
ԱԻՊԾ ներկայացուցիչն ընդգծեց՝ եղանակային պայմանները բարդացնում են աշխատանքների ընթացքը․ «Հատկապես, որ ձյան տեսքով տեղումներ են լինում, բավականին բարդ են լինում աշխատանքները, բայց մեր ջոկատները օր ու գիշեր աշխատում են։ Եղել է դեպք, երբ տեղում պայմանավորվածություն է ձեռք բերվել ու սկսել են լապտերներով նույն տարածքներում փնտրել»։
Ողջ զինծառայողի հայտնաբերման դեռևս 1 դեպք է գրանցվել․ «Նոյեմբերի 14-ին, երբ Շուշիի տարածքում որոնման աշխատանքներ են իրականացվել, 1 հայ և 1 ադրբեջանցի վիրավոր, երկուսն էլ՝ զինվորներ, տեսել ենք և հոսպիտալացրել, դրանից հետո չի եղել»։
Անժելա Պողոսյան
