18.11.2024 | 17:28
ԵՄ-ն դադարեցնում է Վրաստանի կառավարությանը տրամադրվող ֆինանսական օգնությունը․ Բորել
Արա Այվազյանը մասնակցել է Հնագույն քաղաքակրթությունների ֆորումի 4-րդ նախարարական հանդիպմանը
Քաղաքականություն
15.12.2020 | 22:19
ՀՀ ԱԳՆ-ից տեղեկացնում են, որ դեկտեմբերի 15-ին տեղի է ունեցել Հնագույն քաղաքակրթությունների ֆորումի 4-րդ հանդիպումը՝ առցանց ձևաչափով:
«Հանդիպմանը, որը նախագահում էր Պերուն, մասնակցում էին Հայաստանի, Պերուի, Բոլիվիայի, Չինաստանի, Եգիպտոսի, Հունաստանի, Իտալիայի, Իրանի և Իրաքի ներկայացուցիչները: Լիիրավ անդամի կարգավիճակով հանդիպմանն առաջին անգամ մասնակցում էր նաև Մեքսիկայի ներկայացուցիչը:
Իր ելույթում ՀՀ ԱԳ նախարարը բարձր գնահատեց ֆորումի դերը՝ որպես պատմական հարուստ ժառանգություն ունեցող ազգերին և ժողովուրդներին համընդհանուր արժեքների շուրջ միավորող հարթակ: Նախարարը, մասնավորապես նշեց. «Այսօր շատ կարևոր է խաղաղության մշակույթի առաջմղումը` դիմակայելու համար աճող ագրեսիային և բռնությանը, որին ականատես ենք լինում ամբողջ աշխարհում: Խաղաղության մշակույթը կարող է խարսխված լինել միայն միջազգային ամուր համագործակցության վրա, և, այս առումով, Հնագույն քաղաքակրթությունների ֆորումը կարևոր հարթակ է, քանի որ այն միավորում է հնավուրց մշակութային արժեքներ կրող ու հսկայական նյութական և ոչ նյութական ժառանգություն ունեցող երկրների»:
Տեղեկանք. Հնագույն քաղաքակրթությունների ֆորումը մշակութային համագործակցության և երկխոսության հարթակ է, որի նպատակն է նպաստել մշակութային արժեքների պաշտպանությանը և պահպանմանն ուղղված համագործակցությանը:
Հնագույն քաղաքակրթությունների ֆորումի առաջին հանդիպումը կայացել է 2017թ. ապրիլի 23-24-ին Աթենքում, որտեղ ստորագրվել է ՀՔՖ-ի հիմնադրման վերաբերյալ Աթենքի Հռչակագիրը: Որպես հիմնադիր-անդամներ` ֆորումին մասնակցում էին Բոլիվիան, Եգիպտոսը, Հունաստանը, Իրաքը, Իրանը, Իտալիան, Չինաստանը և Պերուն, ինչպես նաև Հնդկաստանն ու Մեքսիկան` դիտորդի կարգավիճակով: Հայաստանը Ֆորումին միացել է 2018թ.:
Հնագույն քաղաքակրթությունների ֆորումի նպատակներն են, ի թիվս այլոց՝
խթանել հաղորդակցությունը մասնակից պետությունների միջև մշակութային փոխանակումների և հարակից բոլոր ոլորտներում համագործակցության միջոցով,
երկխոսություն և խորհրդատվություններ անցկացնել համապատասխան միջազգային կազմակերպություններում, ինչպիսին է ՅՈւՆԵՍԿՕ-ն՝ մշակութային ժառանգության պահպանմանը վերաբերող կարևորագույն հարցերի շուրջ համակարգված դիրքորոշման հասնելու նպատակով,
ջանքերը համադրել մշակույթը որպես ժամանակակից դիվանագիտության արդյունավետ գործիք օգտագործելու նպատակով:
