14.01.2026 | 23:33
Կառավարությունը փոփոխություն է առաջարկում ավագանու անդամների հրաժարականի կարգում
Գլխատված հայեր․ պատերազմի ավարտից հետո էլ էթնիկ հայերի հանդեպ վայրագությունները շարունակվում են․ Guardian
Քաղաքականություն
15.12.2020 | 19:53
Համացանցում լայնորեն տարածվող տեսանյութերը, որոնցում ադրբեջանցի զինվորականների կողմից գլխատվում են երկու տարեց տղամարդիկ, հաստատում են Լեռնային Ղարաբաղում վերջերս գրանցված պատերազմի ժամանակ տեղի ունեցող արյունալի վայրագությունները, գրում է Guardian-ը՝ նշելով, որ գլխատվածների ինքնությունը պարզվել է։
Հայ տղամարդիկ զինվորականներ չեն եղել, այս մասին պարբերականին պատմել են նրանց համագյուղացիները: Երկուսին էլ գլխատել են ադրբեջանական զինված ուժերի համազգեստով տղամարդիկ: Կարճ տեսանյութերում խոշտանգումների և սպանությունների սարսափելի կադրերի տարափ է, որոնք շարունակում են ի հայտ գալ Ռուսաստանի միջնորդությամբ ձեռք բերված հրադադարի ուժի մեջ մտնելուց մեկ ամիս անց նույնիսկ:
Նոյեմբերի 22-ին և դեկտեմբերի 3-ին համացանցում տեղադրված տեսանյութերում ադրբեջանական զինվորական համազգեստով տղամարդիկ դանակով գլխատում են մի տղամարդու, ինչից հետո մեկը կտրված գլուխը դնում է սատկած կենդանու վրա: «Այսպես ենք մենք վրեժ լուծում՝ գլուխները կտրելով»,- ասում է տեսանյութի ձայնը:
Հոդվածում նշվում է, որ Լեռնային Ղարաբաղի Մադաթաշեն գյուղի երկու բնակիչներ համացանցում տարածվող տեսանյութերից մեկում ճանաչել են գլխատվող 69-ամյա Գենադի Պետրոսյանին, որը Արցախ է տեղափոխվել 1980-ականների վերջին, Ադրբեջանի Սումգայիթ քաղաքից:
«Ես հստակ տեսել եմ նրա դեմքը և ճանաչել»,- լրատվամիջոցի հետ զրույցում ասել է գյուղի դպրոցի տնօրեն Գայանե Պետրոսյանը:
Գյուղի բնակիչ Էդուարդ Հայրապետյանը նշել է, որ Պետրոսյանին ճանաչել է ավելի քան 30 տարի: Վերջին անգամ Պետրոսյանն էլ իրեն զանգահարել է հոկտեմբերի 28-ին և հայտնել, որ գյուղում ադրբեջանական ուժեր կան:
Հրապարակման մեջ նշվում է նաև, որ միայնակ ապրող Գենադի Պետրոսյանը հրաժարվել է լքել գյուղը, երբ ադրբեջանական ուժերը մոտեցել են բնակավայրին, իսկ երբ հարևանները փորձել են նրան մեքենա նստեցնել, դուրս է եկել ու իր տուն վերադարձել։
Հոդվածագիրը նշում է, որ առցանց ալիքներում ավելի ու ավելի հաճախ են գերակշռում տեսանյութերը, թե ինչպես են հայ զինվորներն ու խաղաղ բնակիչները բռնության ենթարկվում ադրբեջանական զորքերի կողմից:
Խոշտանգումների մասին նոր բացահայտումները վկայում են այն մասին, որ շատերի համար բռնությունը շարունակվում է նույնիսկ պատերազմի ավարտից հետո: «Հայերն ու ադրբեջանցիները յուրաքանչյուր օր դիտում են այդ տեսանյութերը, և ամեն օր մի նոր տեսանյութ է հայտնվում, որը հարձակման նոր ալիք է ուղարկում հասարակությանն ու խաղում հանրության զգայնության վրա»,- հայտարարել է Human Rights Watch-ի հետազոտող Տանյա Լոքշինան:
Տաթև Ֆռանգյան
