28.04.2026 | 18:35
Ադրբեջանի հետ հարաբերությունների կարգավորում, բանակը` անվտանգության երաշխիք․ ինչ է առաջարկում ԲՀԿ-ն․ ՏԵՍԱՆՅՈՒԹ
Էրդողանը պնդում է, թե Պուտինը սատարում է անվտանգության պլատֆորմ ստեղծելու Բաքվի գաղափարը
Քաղաքականություն
11.12.2020 | 15:26
Թուրքիայի նախագահ Ռեջեփ Թայիփ Էրդողանը հայտարարել է, թե ՌԴ նախագահը սատարում է տարածաշրջանային անվտանգության ապահովման հարթակ ստեղծելու՝ Բաքվի գաղափարը, որը կարող է ներառել Ռուսաստանը, Թուրքիան, Ադրբեջանը, Իրանը, Վրաստանը և Հայաստանը: Թուրքիայի նախագահը նման պնդմամբ հանդես է եկել Ադրբեջանից վերադառնալիս օդանավում լրագրողներին տված հարցազրույցում, գրում է ՏԱՍՍ-ը:
«Պարոն Պուտինը դրական է վերաբերվում այս գաղափարին: Հեռախոսազրույցի ժամանակ նա հարցրեց, թե ինչ կարծիք ունեմ այդ հարցի վերաբերյալ: Ես պատասխանեցի, որ այն բանից հետո, երբ Ալիևը դրական է արձագանքել, կարևոր է, որ ես ևս դրական վերաբերվեմ դրան: Այս հարցում նույնիսկ Վրաստանն էր դուրս եկել օրակարգ»,- Էրդողանի խոսքերն է մեջբերել Haberturk-ը:
Էրդողանը նաև հայտարարել է, որ այդ հարթակին Երևանի միանալու դեպքում «Թուրքիայի ու Հայաաստանի միջև հարաբերություններում կարող է նոր էջ բացվել»։
Դեկտեմբերի 10-ին Իլհամ Ալիևը Էրդողանի հետ բանակցություններից հետո հայտարարել էր, թե Բաքուն և Անկարան պետք է տարածաշրջանում համագործակցության նոր բազմակողմ պլատֆորմ ստեղծեն Լեռնային Ղարաբաղում ռազմական գործողությունների ավարտից հետո:
Տաթև Ֆռանգյան
