Քաղաքականություն
09.12.2020 | 13:52
Լեռնային Ղարաբաղում հակամարտության ավարտից մի քանի շաբաթ անց Ստեփանակերտում ու դրա արվարձաններում հայտնաբերվել է ավելի քան 15 հազար ռազմամթերք։ Այս մասին ՌԻԱ Նովոստիին հայտնել է ԼՂՀ ականազերծման մարդասիրական կենտրոնի տնօրեն Սամվել Մեսրոպյանը։
«Հայտնաբերվել է ավելի քան 15 հազար ռազմամթերք, և սա միայն Ստեփանակերտում ու արվարձաններում: Աշխատել են Լեռնային Ղարաբաղի մարդասիրական ականազերծման կենտրոնը և Խաղաղապահ ուժերի ականազերծման կենտրոնը (ՌԴ)։ Մեզ հենց նոր միացել են ԱԻՆ ականազերծողները, այսօր առաջին օրն է։ Սակայն խաղաղապահների հետ մենք վաղուց էինք աշխատում, հավանաբար 10-12 օր»,- ասել է Մեսրոպյանը:
Նա նաև հայտնել է, որ անցած շաբաթների ընթացքում պայթյունավտանգ առարկաներից մաքրվել է Ստեփանակերտի ու դրա արվարձանների գրեթե կեսը։ Վերջինս նաև հույս է հայտնել, որ այդ տարածքների ականազերծման աշխատանքները կավարտվեն մինչև տարեվերջ։
«Ստեփանակերտ քաղաքի կեսից ավելին արդեն մաքրվել է: Հեկտարներով հաստակ չեմ կարող ասել, բայց կեսից ավելին մաքրվել է: Հիմա մենք աշխատում ենք ծայրամասերում»,- ասել Մեսրոպյանը:
Տաթև Ֆռանգյան
