26.03.2026 | 23:44
Քարաթափում Սիսիան-Լծեն-Տաթև ավտոճանապարհին
Սա բուհական ինքնավարության կոպտագույն խախտում է․ Մենուա Սողոմոնյան. ՏԵՍԱՆՅՈՒԹ
Քաղաքականություն
03.12.2020 | 16:01
2019թ․ փետրվարին շրջանառության մեջ դրված նախագծին ԵՊՀ և ԳԱԱ բացասական եզրակացություն են տվել։ ԵՊՀ-ի և ԳԱԱ-ի կողմից արված բազմաթիվ առաջարկությունները զրո ուշադրության են արժանացել։ Այս մասին ասաց ԵՊՀ հոգաբարձուների խորհրդի անդամ, Քաղաքական ինստիտուտների և գործընթացների ամբիոնի դոցենտ, պատմագիտության թեկնածու Մենուա Սողոմոնյանը՝ անդրադառնալով ռեկտորների նշանակման վերաբերյալ Կառավարության հավանությանն արժանացած օրինագծին։
«Այս օրինագծերի փաթեթով շեշտակի նվազում են բուհական ինքնավարության, հետևապես՝ ակադեմիական ազատությունների հնարավորությունները։ Բացի այդ՝ Գիտությունների ազգային ակադեմիայի կարգավիճակը, որոշ հայագիստական դասընթացների՝ որպես պարտադիր բաղադրիչ դուրս գալու խնդիրները մնում են անհասկանալի»,- ասաց նա։
Սողոմոնյանը նշում է, որ Կառավարությունը նախագիծն ընդունել է այն ավելի վատթարացնող փոփոխությամբ, որը ենթադրում է, որ եթե օրինագծերի փաթեթը խորհրդարանն ընդունի, ապա բուհերի ռեկտորները և գիտական հաստատությունների տնօրենները ոչ թե ընտրվելու են, այլ նշանակվելու են անմիջապես ԿԳՄՍ նախարարության կողմից մինչև 5 տարի ժամկետով։
«Սա նշանակում է բուհական համակարգի համակենտրոնացում։ Սա բուհական ինքնավարության կոպտագույն խախտում, սահմանափակում է։ Սա բուհական համակարգում առաջացնելու է տուրբուլենտություն՝ բուհերին անմիջապես կախման մեջ դնելով քաղաքական իշխանություններից և քաղաքական իշխանությունների փոփոխության պարագայում բուհերի կառավարման ոլորտներում առաջացնելով փոփոխություններ: Ակադեմիական համայնքին, փաստորեն, զրկում են իր իսկ կառավարմանը մասնակցելուց»,- շեշտեց Մենուա Սողոմոնյանը։
Մանրամասները՝ տեսանյութում։
