12.01.2025 | 00:54
Կիևյան փողոցի տներից մեկում հրդեհ է բռնկվել. դեպքի վայր է մեկնել չորս մարտական հաշվարկ
ԱՄՆ նոր պատժամիջոցներ է նախապատրաստում «Հյուսիսային հոսք 2» գազատարի աշխատանքների դեմ․ WSJ
Քաղաքականություն
30.11.2020 | 15:54
ԱՄՆ Կոնգրեսի անդամները «Հյուսիսային հոսք 2» գազատարի կառուցման աշխատանքները «հուղարկավորելուն» ուղղված նոր պատժամիջոցների շուրջ համաձայնության են եկել։ Այս մասին գրում է The Wall Street Journal-ը։
Պարբերականի տվյալներով՝ հերթական տուգանային միջոցառումները կարող են հաղթանակ դառնալ երկու ուկրաինացի լոբբիստների համար։
WSJ-ը գրում է, որ ուկրաինական «Նավթոգազ» ընկերության ներկայացուցիչ Վադիմ Գլամազդինը և Ուկրաինայի ազգային անվտանգության խորհրդի աշխատակից Ալեքսանդր Խարչենկոն 4 տարի փորձել են համոզել Թրամփի վարչակազմին պատժամիջոցների անհրաժեշտության հարցում։ Ուկրաինացիների լոբբինգի ու սենատոր Թեդ Քրուզի կողմից աջակցության շնորհիվ սահմանված սահմանափակումների հետևանքով «Հյուսիսային հոսք 2» գազամուղի կառուցման աշխատանքներն անցած տարի կանգ առան։ Նախագծի ավարտման համար անհրաժեշտ է կառուցել ընդամենը 76 կմ։
Գազատարն ավարտելու համար «Ակադեմիկ Չերսկի» նավը պետք է վերազինվի՝ մեծ տրամաչափի խողովակների հետ աշխատելու համար: Ըստ WSJ- ի՝ նոր պատժամիջոցներն ուղղված են լինելու այն ընկերություններին, որոնք կզբաղվեն վերանորոգման աշխատանքներով, ինչպես նաև այն ձեռնարկություններին, որոնք պետք է ապահովագրեն, ստուգեն և սերտիֆիկացնեն «Հյուսիսային հոսք 2»-ը:
«Հիմա ուկրաինացիները զգում են, որ հաջողությունից երկու քայլ հեռավորության վրա են»,- գրում է The Wall Street Journal- ը:
«Նոր պատժամիջոցները «կդառնան այս նախագծի վերջին մեխը»,- հայտարարել է Վադիմ Գլամազդինը: Նրա խոսքով ՝ սահմանափակող միջոցներն ուժի մեջ մտնելուց հետո գազատարի շինարարությունն ավարտելու «գործնական միջոց» չի լինի:
Տաթև Ֆռանգյան
