Քաոս ու գաղտնիություն Ադրբեջանում․ ընտանիքները փնտրում են իրենց կորած զինվորներին

Լեռնային Ղարաբաղում Մոսկվայի միջնորդությամբ ձեռք բերված հրադադարից հետո անհետ կորած ադրբեջանցի զինվորների ընտանիքները փորձում են նրանցից ինչ-որ լուր  ստանալ։ Պետական մարմինները, սակայն, տեղեկություններ չեն տրամադրում, գրում է «Ազատության» տեղական ծառայությունը։

«Պաշտպանության նախարարության թեժ գծով ինձ ասացին, որ նա վիրավորների թվում չէ»,- լրատվամիջոցին պատմել է Շիրվանից 21-ամյա զինծառայող Յահյա Աբդինովի զարմիկը։

Աղբյուրի համաձայն՝ հնարավոր է՝ Ադրբեջանն ունի հազարավոր զոհեր, սակայն իշխանություններից զատ՝ ոչ ոք այդ մասին չգիտի։

«Բոլորը տարբեր բաներ են ասում։ Մեկն ասում է՝ նա ողջ է ու իրականացնում է իր ծառայությունը, մյուսն ասում է՝ ինչ-որ տեղ է, որտեղ բջջային կապը չի աշխատում, ուստի չի կարող զանգել։ Մենք չենք կարող ստույգ տեղեկություն ստանալ»,- ասել է զինծառայողի զարմիկը՝ Սադայ Թագիևը։

Ըստ լրատվամիջոցի՝ հաշվի առնելով այն, թե ինչպես են Բաքվում ու մյուս քաղաքներում թարմ գերեզմաններ հայտնվում, հնարավոր է՝ հազարավոր ադրբեջանցիներ են զոհվել։

Ալիևի վարչակազմը լռում է կորուստների մասին, տարբեր պաշտոնյաներն էլ այս թեմայով հրաժարվում են պատասխանել լրագրողների հարցերին, այդ պատճառով զինծառայողների ծնողներն ու ազգականները պարբերաբար հավաքվում են Բաքվի հիվանդանոցների մոտ, վիրավորների ցուցակները ստուգում։

2003թ-ից իշխանության գալուց հետո, ըստ հրապարակման, Իլհամ Ալիևն իր վերահսկողության տակ է պահում լրատվամիջոցներին։ Այս տարվա սկզբին «Լրագրողներ առանց սահմաններ» կազմակերպության հրապարակած մամուլի ազատության ցուցանիշով՝ Ադրբեջանը 180 երկրների շարքում 168-րդն է։ Սակայն սեպտեմբերի 28-ին հայտարարված ռազմական դրությունն իշխանություններին թույլ է տվել ավելի խիստ սահմանափակումներ մտցնել, և մարդիկ ոչինչ չեն կարող ասել կամ հաղորդել հակամարտության մասին։

Նշվում է նաև, որ Ալիևը ռուսական հեռուստատեսության եթերում ասել էր, թե ադրբեջանական հասարակությունը ռազմական գործողությունների ավարտից հետո կտեղեկացվի կորուստների մասին, սակայն մինչև այսօր ադրբեջանական կողմը պաշտոնապես ոչ մի տեղեկավություն չի հաղորդում կորուստների մասին։

Էմմա Չոբանյան