11.10.2026 | 23:33
Հակոբ Շարբաթյանը՝ բռնցքամարտի Եվրոպայի Մ-17 չեմպիոն. ՏԵՍԱՆՅՈՒԹ
«Հանուն Հանրապետության» կուսակցության ղեկավար մարմնի անդամները հանդիպում են ունեցել ՀՀ-ում Նիդերլանդների Թագավորության դեսպանի հետ
Քաղաքականություն
27.11.2020 | 15:55
«Հանուն Հանրապետության» կուսակցության ղեկավար մարմնի անդամներ Արթուր Մանուկյանը, Ռուբեն Մեհրաբյանը, Սարգիս Գրիգորյանը և ղեկավար մարմնի ներկայացուցիչ, ԱԺ պատգամավոր Արման Բաբաջանյանը հանդիպում են ունեցել Հայաստանում Նիդերլանդների Թագավորության արտակարգ և լիազոր դեսպան Նիկո Սխեմերսի հետ:
«Հանդիպման ընթացքում ղեկավար մարմնի ներկայացուցիչ Արման Բաբաջանյանը շնորհավորել է նորանշանակ դեսպանին մեր երկրում դիվանագիտական առաքելությունն սկսելու կապակցությամբ՝ նշելով, որ Հայաստանը ցանկանում է Նիդերլանդների հետ հարաբերությունները զարգացնել բոլոր ուղղություններով՝ քաղաքական, տնտեսական, մշակութային, ինչի վկայությունն է նաև Հայաստանում Նիդերլանդների դեսպանության բացումը: Քննարկվեցին նաև պատերազմի ավարտից ի վեր տարածաշրջանում ստեղծված նոր ստատուս քվոն, որ ձգտում է դառնալ հարավկովկասյան նոր աշխարհակարգ:
Հանդիպման ժամանակ անդրադարձ կատարվեց նաեւ երկրում ներքաղաքական ճգնաժամի հաղթահարման համար անհրաժեշտ քայլերի, այդ թվում արտահերթ գործընթացների անհրաժեշտությանը:
Դեսպան Սխեմերսը շնորհակալություն է հայտնել հրավերի և հանդիպման կազմակերպման համար, վստահեցնելով, որ կանի ամեն հնարավորը երկու պետությունների միջև տարբեր ոլորտներում համագործակցությունը խորացնելու և հարաբերություններն առավել սերտացնելու համար:
Հանդիպմանը երկուստեք կարևորվել է Հայաստանի տնտեսության մեջ նիդերլանդական ընկերությունների ներկայացվածության ընդլայնումը, այլ ոլորտներում փոխանակումների աշխուժացումը, համագործակցությունը միջազգային կազմակերպությունների շրջանակներում:
Պայմանավորվածություն է ձեռք բերվել հետագա շփումներին տալ կանոնավոր բնույթ»,- ասված է կուսակցության տարածած հաղորդագրությունում:
