18.11.2024 | 18:51
Արգիշտի Քյարամյանը աշխատանքային վերջին խորհրդակցությունն է անցկացրել
Արտակ Ապիտոնյանը մասնակցել է Ֆրանկոֆոնիայի նախարարական համաժողովի առցանց նիստին
Քաղաքականություն
25.11.2020 | 14:17
Նոյեմբերի 24-ին ՀՀ արտաքին գործերի նախարարի տեղակալ Արտակ Ապիտոնյանը մասնակցել է Ֆրանկոֆոնիայի նախարարական համաժողովի 37-րդ առցանց նիստին, որի ընթացքում հանդես է եկել ելույթով:
«ԱԳ նախարարի տեղակալն իր ելույթում, մասնավորապես, անդրադարձավ աշխարհում տիրող Covid-19 համավարակի պայմաններում առկա մարտահրավերներին առողջապահական, տնտեսական, սոցիալական և կրթական ոլորտներում։ Վերջինս Ֆրանկոֆոնիայի նախարարական համաժողովի ընթացքում ներկայացրեց Հայաստանի՝ որպես Ֆրանկոֆոնիայի գագաթաժողովում նախագահող երկրի առաջարկած բանաձևը, որ կրում է «Ապրել միասին Covid-19 համավարակի պայմաններում և հետկովիդյան աշխարհում» խորագիրը:
Արտակ Ապիտոնյանն անդրադարձավ սեպտեմբերի 27-ին Թուրքիայի աջակցությամբ Ադրբեջանի կողմից սանձազերծած ռազմական ագրեսիային՝ ի հեճուկս՝ համաճարակի ընթացքում աշխարհում խաղաղության և անվտանգության պահպանման ՄԱԿ-ի Գլխավոր քարտուղարի կոչին։ ԱԳ նախարարի տեղակալը խոսեց նաև մեծաքանակ զոհերի, հազարավոր փախստականների, Արցախում քաղաքացիական ենթակառուցվածքների ավերման, հայկական մշակութային ժառանգությանը սպառնացող վտանգների, Ադրբեջանի կողմից իրականացված միջազգային հումանիտար իրավունքի խախտումների և պատերազմական հանցագործությունների մասին։ Նշվեց, որ նոյեմբերի 9-ին ստորագրված եռակողմ հայտարարությունը կոչված է նախ և առաջ դադարեցնելու ռազմական գործողությունները և ապահովելու անվտանգության միջոցառումների իրականացումը և ընդգծվեց, որ ԵԱՀԿ Մինսկի խմբի համանախագահության շրջանակներում շարունակվելիք բանակցությունների ընթացքում քննարկվելու է Արցախի կարգավիճակի հարցը՝ Արցախի ժողովրդի ինքնորոշման իրավունքի հարգմամբ:
Առցանց նիստի ընթացքում անդրադարձ կատարվեց նաև ահաբեկչության դեմ պայքարին առնչվող խնդիրներին, մասնավորապես՝ Արցախի դեմ սանձազերծված ագրեսիայի ընթացքում Թուրքիայի կողմից սիրիացի վարձկան ահաբեկիչների ներգրավմանը»,- ասված է հաղորդագրությունում:
